De Vorsterman Bijbel

§ Dat .vij. Capittel.

1

⁺MAer die kinderen van Israel ouertraden dat ghebot, ende si ghebruycten van dat verbande, Want Achan die sone Charmi des soons Sabdi, des soons ^* Sare) vanden gheslachte Iuda, nam wat van den verbanden, Ende die HEERE is toornich gheworden teghen die kinderen van Israel.

+ A

* the. Zerah

2

Doen nv Iosue mannen wtsant, van Iericho tot Hai, die bi BethAuen leget, tegen dat Oosten voor BethEl, ende sprack tot hen, Gaet op, ende bespiet dat landt, ende si hebben volbracht, dat hen beuolen was, ende Hai bespiedet,

3

ende quamen weder tot Iosue, ende spraken tot hem, En laet al dat volc niet opwaerts reysen, maer laet twee oft drie duysent mannen, opwaerts reysen, ^* ende die stadt te niet doen,) Waeromme sal alle dit volck ghequelt worden teghen zeer luttel vianden.

* th. ende slaen Ai

4

Also trocken drie duysent strijtbaer mannen des volcs opwaerts ende die vluchteden voor die mannen van Hai, ende keerden den rugghe,

5

ende van desen vielen inden doot sessendertich mannen, ⁺ ende veruolchdense van die poorte tot Sabarim toe, ^* si vielen Vliende door bereyde plaetsen,) Doen wert den volcke therte verzaget, ende wert ^* smiltende) als watere,

+ B

* th. ende sloegense den wech

* ten is niet int hebree.

6

Maer Iosue veschoorde zijn cleederen, ende viel op zijn aensichte te aerden voor die arcke des HEEREN, tot des auonts metten outsten van Israel, ende wierpen stof op haer hoofden.

7

Ende Iosue sprack, Ach HEERE ^*) waeromme woudy dit volck ouer die Iordane leyden, dat ghi ons in die handen der Amoriten soudt gheuen, ons te verdoene? O oft wi op ghene side der Iordanen waren ghebleuen, soo wi beghonst hadden,

* th. HEERE

8

Ach mijn HEERE God, wat sal ick segghen, nv Israel sinen vianden den rugghe keert?

9

die Cananiten ende die inwoonders des landts sullen dit hooren, ende te samen tot eenen hoope verghadert worden, ghelijck eenen cloot, soo sullen si ons omuangen, ende ooc onsen naem wtroeyen vander aerden, Wat suldy dan uwen grooten name doen?

10

Doen sprac die HEERE tot Iosue, staet op, Waerom ligt ghi also op uwe aensicht?

11

Israel heeft hem besondicht, ende si heb-[kolom]ben mijn verbont ouerghegaen, dat ick hen gheboden hebbe, Daer toe hebbe si ooc vanden verbanden ghenomen, ende gestolen, ende gheloghen, ende onder haere ghereetschap verborghen gheleyt,

12

Die kinderen van Israel en moghen niet staen, voor haere vianden, maer moeten haere vianden den rugghe keeren, Want si zijn besmettet met verbanden dinghen, Ick en sal voortaen niet met v zijn, totter tijt toe, dat ghi verniele den ghenen die dusdanich is.

13

⁺Staet op, ende heylicht dat volck, ende segt hen, heylicht v teghen morghen, ⁺ want alsoo seyt die HEERE die God van Israel, Daer is eenen ban onder v Israel, daer omme en cont ghi niet ghestaen voor uwe vianden ^* tot dat hi wt v wtgewist is die met deser sonde besmet is,)

+ C

+ Leui. xx.b Num. xi.d i. Io. xvi.b

* the. tot dat ghi den ban van v doet

14

Ghi sult morghen vroech toe ghaen, eenyegelijck door uwe gheslachte na den anderen, ende welcke gheslachte die HEERE vinden sal, dat sal voort comen, deen gheslachte na dat andere, Ende dwelcke gheslachte die HEERE raken sal, dat sal voort comen, deen huys na dandere,

15

Ende dwelcke huys die HEERE raken sal, dat sal voortcomen, deen huyswaert na den anderen, Ende die beuonden wordt in ^* dusdanige groote sonde) dien salmen met vyer verbranden, met alle dan hi heuet, Om dat hi dat verbondt des HEEREN ouerghetreden heeft, ende een onbehoorlijck stuck bedreuen heeft.

* th. den ban

16

Doen stont Iosue des morghens vroech op, ende dede Israel voortcomen, dat een geslachte na den anderen, ende dat geslachte Iuda wert gheraect,

17

ende doen hi dat gheslachte van Iuda daer toe brachte, soo wert dat gheslachte van ^* Sare) gheuonden, Ende doen hi dat gheslachte van ^* Sare) toebracht, die een huyswaert na den anderen, ⁺ soo wert Sabdi geraect,

* the. Zerah

* the. Zerah

+ D

18

Ende doen hi zijn huys toe bracht, die een waert na den anderen, soo wert gheraect Achan die sone Charmi des soons Sabdi des soons ^* Sare) wt den geslachte Iuda.

* the. Zerah

19

Ende Iosue sprack tot Achan, Mijn sone geeft den HEERE den Gode van Israel die eere, ☞ ende gheeft hem den lof, ende gheeft mi te kennen wat ghi ghedaen hebt, ende en loochent daer niet af,

20

Doen antwoorde Achan tot Iosue, ende sprack, Warachtelijc ick hebbe mi besondicht aen den HEERE den Godt van Israel, alsoo ende alsoo hebbe ick gedaen,

21

Ick sach onder den roof eenen zeer costeliken Perschen mantel, ende twee

[p. n4r]

hondert sikelen siluers, ende een gulden rije, vijftich sikelen swaer in gewichte dies gheluste mi, ende ick nam dat, ende ic hebt in die aerde ghedubt ende ouerscharret, tegen dat middel van mijnder wooninge, ende dat siluer daer onder, ^* hebbe ick in die aerde ghegrauen.)

* ten is niet int hebree.

22

Doen sandt Iosue dienaers die liepen tot die woninge, ende vondent al verborghen inder seluer plaetse ende dat siluer daer mede.

23

Ende daer wtnemende, brochten zijt tot Iosue, ende tot allen den kinderen van Israel, ende schuddent voor den HERE.

24

Doen nam Iosue ende alle Israel met hem Achan den sone ^* Sare,) metten siluer, mantel, ende gulden rije, sine sonen ende dochteren, zijn ossen ende ezelen, ende schapen, zijn wooninghe, ende al dat hi hadde, ende leydense op, int dal Achor.

* the. zerah

25

Ende Iosue sprac daer, Want ghi ons verstoort hebt, ⁺ soo verstoore v die HEERE in desen daghe, ende si steenden hem, alle Israel, ende verbranden hem met vier, ende al wat hem toebehoorde,

+ ij.re. xxviij

26

ende doen sise ghesteent hadden, so maecten si daer eenen grooten steenhoope ouer, die blijft tot desen daghe toe. Ende die toornicheyt des HEREN is alsoo van hen ghekeert. Daer af hiet die selue plaetse dat dal Achor, tot desen dach toe.

§ Hoe Iosue die stadt Hai wint, Ende hoe Iosue eenen steenen altaer maecte ende die tweede wet wert gescreuen op die steenen Ende hoe Iosue dat volck ghebenedijt.