De Vorsterman Bijbel

§ Dat .xxvij. Ca.

1

⁺ENde Moyses gheboot, ende die ouders van Israel den volcke, seggende. Hout alle die geboden die ic v huyden ghebiede.

+ A

2

Ende tot dier tijt, ⁺ als ghi ouer de Iordane gaet in dat lant dat die HERE uwe God v gheuen sal, so suldy groote steenen oprechten, ende wittense met kalck,

+ Iosu. iiij.a.

3

op dat ghi scriuen moecht daer op alle die woorden van deser wet, als ghi daer ouer coemt, op dat ghi comen moeghet in dat lant, dat die HEERE uwe god v gheuen sal, een lant daer melck ende hoenich in vloeyt, also ^* hi uwen vaderen ghezworen heeft)

* th. die HERE uwer vaderen god geseit heeft

4

Ende als ghi nv ouer die Iordane ghegaen zijt, ⁺ so suldi sulcke groote steenen oprechten, (daer ic v huyden af ghebiede) opten berch Hebal, ende met kalcke witten,

+ Exo. xx.d. Iosu. viij.f

5

ende ghi sult aldaer den HEERE uwen Gode eenen steenen outaer maken, daer en sal gheen yser ouer gaen

6

Van gheheele steenen ^* die sonder maecsel ende oneffen zijn) suldi desen altaer den HERE uwen Gode maken, ende ghy sult den HEERE uwen Gode daer op brandtoffer offeren,

* ten is nyet int Hebr

7

⁺ende ghi sult vreedsaemen offer offeren, ende aldaer eten, ende vrolic zijn voor den HERE uwen God,

+ B

8

ende ghi sult op de steenen scriuen alle die woorden van deser wet claer ende wel.

9

Ende Moyses ende die priesteren vanden geslachte Leui spraken tot alle Israel, ende seyden. Merct ende hoort toe Israel. Huyden sidi geworden een volc des HEREN ws gods

10

Ghi sult ^* zijn) stemme hooren, ende ghi sult doen na zijn geboden ende zeden die ic v huyden ghebiede.

* th. des HEREN ws Gods.

11

Ende Moyses geboot den volcke inden seluen daghe seggende.

12

Dese sullen staen opten berch ^* Garisim) om te gebenedien dat volc als ghi ouer die Iordane gegaen zijt. Simeon, Leui, Iuda, Isachar, Ioseph, ende Ben Iamin.

* th. Grisim

13

Ende dese sullen staen ^* tegen ouer) opten berch Hebal, om te vermaledien, Ruben, gad Asar, Sabulon, Dan ende Nephtali.

* ten is nyet int hebre

14

Ende die Leuiten sullen beginnen ende seggen tot alle man van Israel met luyder stemmen.

15

Vermaledijt si, die een godeken oft gegoten beelt maect, een grouwelicheit des HEREN, ⁺ dat een werc is der wercmeesters handen, ende settet verborghen, ende al tvolc sal antwoorden ende seggen Amen. ⁺

+ C

+ Amen, dat is, dat ghesciede also

16

Vermaledijt si, die zijn vader ofte moe-[kolom]der ^* niet en eert) ende alle dat volc sal segghen Amen.

* theb. vloect oft veracht

17

Vermaledijt si, die zijns naesten palen enger maect, ende alle tvolc sal seggen Amen.

18

Vermaledijt si die eenen blinden doet dolen inden wege, ende alle dat volc sal segghen Amen.

19

Vermaledijt si, die des vremdelingen recht ende des weesen, ende der weduwen ^* verkeert) ende alle tvolc sal seggen Amen.

* th. buycht.

20

Vermaledijt si, die bi zijns vaders wijf leyt, ende ontdect zijns vaders decsel, ende alle tvolc sal seggen, Amen

21

Vermaledijt si, die by eenige beeste leyt, ende alle tvolc sal seggen Amen.

22

⁺Vermaledijt si, die bi zijn suster leyt, die zijns vaders oft zijns moeders dochter is, ende alle tvolc sal segghen, Amen.

+ D

23

Vermaledijt si, die die bi zijns wijfs moeder slaept, ende alle tvolc sal seggen, Amen.

24

Vermaledijt si, die sinen naesten heimelick slaet, ende alle tvolc sal seggen, Amen.

^* Vermaledijt si, die bi zijns naesten huysurouwe slaept, ende alle dat volc sal seggen Amen.

* ten is nyet int hebre.

25

Vermaledijt si, die giften neemt, dat hi slaen soude die siele van dat bloet vanden onsculdigen, ende alle tvolc sal seggen Amen.

26

Vermaledijt si, ⁺ die niet en blijft in alle die woorden deser wet, ende niet en volbrengt, ende alle tvolc sal seggen, Amen.

+ Gala. iij.a.

§ Van die beloften der gebenedijnge den genen die de geboden houden, ende der vermaledijnghen den ghenen diese niet en houden.