De Vorsterman Bijbel

§ Dat .xxv. Capittel

1

WAnneer eenigen twist tusschen mannen is ^* ende si roepen tot die rechters) soo salmense voor dat recht brenghen, ⁺ ende doen hen recht, ende gheuen den rechtuaerdighen recht, ende den ongoddeliken verdoemen.

* ten is nyet int hebr.

+ A

2

Ende ist dat die ongoddelike slaghen verdient heeft, soo sal die rechtere hem neder heeten vallen ende sal ghebieden datmen hem voor hem slaen sal, na die mate ende dat getal van zijnder misdaet.

3

Alsmen hem veertich slaghen ghegeuen heeft, soo en salmen hem niet meer slaen, op dat niet so wanneermen hem meer slagen geeft, te vele geslaghen en worde, ⁺ ende dat v broeder deerlijcken voor uwen oogen si verschuert in sinen velle.

+ Thes. v.c i.Co. .ix.

4

⁺Ghi en sult den dorsschenden osse die inden dorsuloer dat coren wt tredet, sinen muyle niet verbinden.

+ B

5

Als broeders met malcanderen woonen, ende die eene sterft sonder kinderen, so en sal des verstoruens wijf buyten ghenen vreemden man nemen, Maer haer zwagher salse beslapen, ende tot eenen wiue nemen, ende trouwense,

6

ende den eersten sone dien si baert, dien sal hy verheffen na den naem van sinen ghestoruenen broeder, dat sinen name niet en worde wt ghedaen wt Israel.

7

Maer en genoeget den man niet, dat hi zijn zwagerinne nemen soude, ⁺ so sal si, zijn zwagerinne opgaen onder die poorte, voor die ouders, ende segghen. Mijn zwagher weygert sinen broeder eenen naem te verwecken in Israel, noch mi te houwelijck te nemen.

+ C

8

Dan sullen hem die ouders vander stadt halen, ende hem dat vraghen. Als hi dan staet, ende spreect, het en belieft mij niet haer te nemen,

9

so sal zijn zwagherinne voor hem comen voor die ouders, ende trecken hem zijn schoenen wt van sinen voet, ende spouwen hem in zijn aengesichte, ende si sal antwoorden ende seggen. Also salmen doen eenen yeghelijcken die zijns broeders huys niet timmeren en wille.

10

Ende sinen name sal in Israel heeten, des ongeschoeyts huys.

11

Als twee mannen met malcanderen twist hebben, ende dat wijf vanden eenen loopt toe, om dat si haeren man verlossen soude van des ghenen hant die hem slaet, ende steect haer handt wt ende grijpt hem met sine scamelheit,

12

so suldy haer die hant af houwen, ende v ooghe en sal haer niet ontfermen.

13

Ghi en sult gheen tweederley ghewichte in uwen sack hebben, groote ende cleyne,

[p. m3v]

14

⁺Ende in uwen huyse en sal geen tweederley ^* mudde) zijn, groot ende cleyn.

+ D

* th. Epha

15

Ghi sult een vol ende recht gewichte ende een vol recht ^* mudde) hebben, op dat ghi lange leuen moecht int lant dat v die HEERE v God gheuen sal.

* th. Epha

16

Want die HERE veronwaert den ghenen die dusdanige dingen doen, ende alle onrechtuaerdicheit.

17

Ghedenckt wat v die Amalekiten inden weghe deden, doen ghi wt Egipten troct,

18

hoe si v aentasten inden weghe, ende si sloeghen uwe achtersten, alle die swacke die achter v na quamen, doen ghi moede ende mat waert ^* ende met hongher ende arbeyt verlast) ende si en vreesden God niet,

* ten is nyet int he.

19

Als v die HERE v god in die ruste brengt van alle v omliggende vianden, inden lande dat v die HEERE v God gheeft, tot eender eruen om te besitten, so suldi die gedachtenisse der Amalekiten wt doen van onder den hemel. Wacht dat ghi dat niet en vergetet.

§ Vanden eersten vruchten, ende vanden thienden te gheuen, Ende Gods gheboden te doen ende te houden, ende te volbrengen wt alder herten ende wt alder sielen.