De Vorsterman Bijbel

§ Dat .xxij. Capittel.

1

⁺WAnneer ghi ws broeders os oft scaep siet gaen dolen, ⁺ so en suldi niet voorbi gaen van hen, Maer ghi sult hem weder tot uwen broeder brengen,

+ A

+ Exod. iij.a

2

Ende als v broeder verde van v is, ende ghi en kent hem niet, soo suldi den osse in v huys nemen, dat hy bi v blijue tot dat hem v broeder soect, ende hem dan weder gheuen,

3

Alsoo suldi ooc doen met sinen ezele, met sinen cleede, ende met alle dat verloren is, dat welc v broeder verliest ende ghijt vint, ghi en moges niet ongemerct laten oft vremt ware.

4

Als ghi ws broeders ezele oft osse siet vallen inden wege, ghi en sult hem niet versmaden, maer ghi sult hem op helpen.

[p. m2r]

5

Een wijf en sal gheens mans iuwaeyen dragen, ende een man en sal gheen vrouwen clederen aen doen. Want wie dit doet, dye mishaecht den HERE, ende is een afgriselicheyt.

6

Als ghi inden wege wort siende eenen voghels nest, op eenen boom, oft opter aerden met iongen, oft met eyeren, ende die moeder sidt op die iongen, oft op die eyeren, so en suldi dye moeder metten ionghen nyet nemen,

7

maer ghi sult die iongen nemen, ende die moeder laten vlieghen, op dat v wel geschiede, ende langhe leuen moecht.

8

⁺Als ghy een nieu huys maect, soo maect om dat dac een scutsel, op datter geen bloet op v huys en come, als yemant daer af viele

+ B

9

Ghi en sult uwen wijngaert niet met menigherley zaet bezaeyen, op dat ghy dat zaet niet en heylicht tot der vullinghen, dat ghy gezaeyt hebt, met dat ghene dat v in coemt vanden wijngaert,

10

Ghi en sult niet ackeren met eenen osse, ende met eenen ezel te samen

11

Ghi en sult niet aentrecken een cleet dat van wullen ende lijnen ghemenget is,

12

Ghi sult fraengien al om v vier hoecken ws mantels maken, daer ghi v mede bedect.

13

Als yemant een wijf neemt, ende hi wort op haer gram, als hyse beslapen heeft,

14

aentijende haer yet scandelics, ende hi brenghet eenen quaden roep van haer, wt segghende Dit wijf heb ic genomen, ende doen ic my tot haer dede, beuant ic dat si gheen maecht en was.

15

⁺Soe sullen die vader ende die moeder vander deerne haer nemen, ende si sullen teekenen brengen van des deernen maechdoms voor die ouders vander stadt in dye poorte.

+ C

16

Ende der deernen vader sal seggen totten ouders. Ic heb desen manne mijn dochter tot eenen wiue ghegeuen, ende nv is hi op haer gram gheworden,

17

ende tijdet haer een schandelic dinck aen, segghende. Ic en hebbe uwe dochter gheen maecht geuonden. Dat is dat teeken van mijns dochters maechdom, Ende si sullen dye cleederen wt spreyden voor die ouders vander stadt.

18

Ende dan so sullen die ouders vander stadt den man nemen, ende castijen hem met slaghen,

19

ende laten hem om hondert sikel siluers boeten, ende geuen die der deernen vader, om dat hi een maecht van Israel beurucht heeft, ende hy salse tot eenen wijue hebben, ende hy en machse zijn leuen lanck nyet laten.

20

Maer ist waer, dat die deerne gheen maecht geuonden en is,

21

so salmense buyten haers vaders duere leyden ende dye luyden vander stadt sullense doot steenen, om dat zij een onbehoorlicheyt ghe-[kolom]daen heeft, Ende in haers vaders huys ghehoereert heuet, Ende ghi sult dat quaet van v doen.

22

⁺Als yemant beuonden wort die bi een vrouwe slaept, die eenen ghetrouden man heeft, ⁺ soe sullen si beyde steruen, die man ende dat wijf daer hy by geslapen heeft ende ghi sult dat quaet van Israel wech doen.

+ D

+ Leui. x.b

23

Als een deerne yemanden belooft is, ende een man crijchtse in die stadt, ende slaept bi haer,

24

so suldijse alle beyde ter stadt poorten wt voeren, ende men salse beyde steenen, dat si steruen. Die deerne daer om, dat si niet gheroepen en heeft, want si was in die stadt. Den man daer om, dat hi zijns naesten wijf vernedert heeft, ende ghy sult dat quaet van dat middel van v doen.

25

Ende als yemant een verloefde deerne opten velde crijcht, ende hi grijptse, ende hi slaept bi haer, soo sal die man alleene steruen, die bi haer geslapen heeft,

26

ende die deerne en sal niet steruen, want si en heeft gheen sonde gedaen, die des doots waerdich is. Maer ghelijck als yemant hem verheft teghen sinen naesten, ende slaet zijn siele doot, also is dit oec.

27

Want hi vantse inden velde, ende dye verloefde deerne riep, ende daer en was nyemant diese holp.

28

Als yemant aen een maecht coemt die nyet verloeft en is, ende hy neemtse, ende slaept bi haer, ende si worden beuonden,

29

so sal dyese beslapen heeft, haeren vader veertich sikel siluers geuen, ende hi salse tot eenen wiue hebben, daer om dat hijse vernedert heuet, ende hy en machse nyet laten zijn leuen lanck.

30

Nyemant en sal zijns vaders wijf nemen, ende hy en sal niet ontdecken zijns vaders decsele.

§ Wie datter tot die vergaderingen mochten comen. Van dye besmettinge inden slaep, datmen niet woeckeren en sal. Dye geloften te houden.