De Vorsterman Bijbel

§ Dat .xxi. Capittel.

1

⁺ALsmen eenen verslagenen vint in dat lant, dat die HEERE v Godt v geuen sal om te besitten, ende leet daer int velt, ende men en weet niet wie hem verslagen heuet,

+ A

2

So sullen dan die ouders ende rechters wtgaen, ende meten vanden verslagenen aen, alle die omliggende steden,

3

Die welcke stede dan daer die naeste is, die ouders van deser seluer stadt sullen nemen een ionge koe vanden runderen, daermen niet mede gearbeyt en heeft, noch iock ghetrocken en heeft,

4

ende si sullense af leyden tot eenen keyachtighen gront, die noch ghewonnen, noch bezaeyt en is, ende aldaer sullen si haer den hals af houwen.

5

Ende daer toe sullen die priesters comen, die kinderen Leui (want die HEERE v Godt heeftse vercoren, dat si hem dienen, ende sinen name louen, ende na haeren mont sullen alle saken ende plagen hanghen,)

6

Ende alle die ouders van dier stadt sullen comen totten verslaghenen, ⁺ ende wasschen haer handen ouer die ionge koe, ⁺ die daer den hals af geslagen is,

+ B

+ Ioan. i.d.

7

ende si sullen antwoorden, ende seggen, Onse handen en hebben dit bloet niet ghestort, ende onse ooghen en hebbent ooc niet ghesien,

8

weest genadich uwen volcke Israhel, dat welcke ghy dye HEERE verlost hebt, ende en rekent niet dit ontschuldich bloet int midden onder uwen volcke van Israel, Ende alsoo sal die schult des bloets van hen ghenomen worden,

9

Ende also suldi dat ontschuldich bloet van v doen, doende dat ghene dat recht is voor des HEEREN ooghen.

10

Als ghy inden crijch trecken sult teghen uwe vianden, ende die HEERE uwe Godt gheeftse in uwen handen, dat ghi haer gheuangen wech voert,

11

ende siedi een schoon wijf onder die geuanghenen, ende hebdise lief, dat ghise tot een wijf neemt,

12

so leytse in uwen huyse, ende si sal haer har af scheren, ende haer nagelen cortten,

13

⁺ende legghen die cleederen af daer si in geuanghen is, ende latense sitten in v huys, ende beweenen een maent lanc haeren vader ende haer moeder, daer na beslaetse, ende neemtse te houwelic, ende laetse v wijf zijn

+ C

14

Ende als si naemaels niet meer in ws herten sin en rust, soo suldyse wt laten werwaerts dat si henen wille, ende en vercooptse nyet [kolom] om ghelt, noch versetse niet, Om dat ghyse vernedert hebt.

15

Als yemant twee wiuen heeft, eene die hy lief heeft, ende eene die hi haet, ende baren si hem kinderen beyde die liefste, ende die hi hatet, ist dat die eerst geboren behoort der geender die hi haet,

16

Ende als den tijt coemt dat hi sinen kinderen die erue wt deylt, so en mach hi niet des liefsten wijfs sone den eersten geboren sone maken, voor der ghenen sone die hi haet,

17

Maer hi sal bekennen der geendren sone die hi haet, dat hi die eerste geboren is, ende geuen hem dubbelle ghifte, van al dat hi heeft, Want dese is dat beginsel van sinen kinderen, ende des eerstgeborens recht is zijn.

18

Als yemant eenen crijgelen ende ongehoorsamen sone ghewonnen heeft, dye zijns vaders ende zijns moeders stemme niet hooren en wilt als si hem straffen, ende als hi ghedwonghen is, niet en wilt gehoorsaem zijn, ende hi versmaetse,

19

so sullen si hem gripen, ende brengen aen die poorte totten ouders vander stadt,

20

ende seggen, Dese onse sone is onghehoorsaem, ende hi en hoort ons niet, ende hy is gulsich ende oncuys,

21

Soo sullen hem dan steenen alle die luyden van dier stadt, tot dat hi sterue, ende ghi sult alsoo dat quaet van v doen, dattet alle Israel hoore, ende vreese.

22

⁺Als yemant een sonde ghedaen heeft, die waerdich is des doots, ende wort hi alsoo gedoot datmen hem aen een galghe hanct,

+ D

23

soo en sal zijn lichaem aent hout nyet blijuen ouer nacht, maer ghy sult hem van dyen daghe begrauen, ⁺ Want vermaledijt is hi van Gode, die daer hanct aent hout op dat ghi v lant niet en ontreynicht, datwelcke v die HEERE v God gheeft tot een erue.

+ Gal. iij.b. Ioan. x.c.

§ Datmen achte sal hebben op des naesten goet, Dat mans vrouwen noch vrouwen mans cleederen niet en sullen gebruycken. Menigherley dingen onder malcanderen niet te menghen.