De Vorsterman Bijbel

§ Dat .xxxij. Capittel.

1

⁺RVbens kinderen ende Gads kinderen hadden zeer veel vees, ende si hadden in beesten ontalliken rijcdom, ende sagen dat dat landt Iaser ende ^* Galaad) bequaem plaetsen waren voor haer vee,

+ A

* th. Gilead

2

daerom quamen si ende spraken tot Moysen ende totten priester Eleasar, ende totten hooftluyden der ghemeynten ende seyden,

3

Dat lant Ataroth, Dibon, Iasar Nemra, Hesebon, Eleale, Sobam, Nebo, ende Beon,

4

dat die HEERE gheslaghen heeft int aensichte der kinderen van Israel is zeer bequaem ende vruchtbaer, om beesten te houden, ende wi uwe knechten hebben veel vees,

5

Ende wi bidden, ist dat wy ghenade gheuonden hebben voor v, soo gheeft dit lant uwen knechten, ons eyghen ende en doet ons luyden niet ouer die Iordane trecken.

6

⁺Moyses sprack tot hen luyden, Sullen uwe broederen inden strijdt trecken, ende ghi sult hier bliuen sitten?

+ B

7

Waerom keerdy der kinderen van Israels herten, dat si niet en sullen dorren ouertrecken int landt dat hen die HEERE gheuen sal?

8

Deden oock v vaderen niet also, doen icse wtsant van Kades Berne, om dat lant te besien?

9

ende als si weder op gecomen waren tot aen die velden der wijndruyen, ende saghen dat lant, ende omkeerden der kinderen van Israels herten dat si niet en wilden trecken in die palen des lants dat hen die HEERE gegeuen hadde,

10

Ende des HEREN toren vergramde op henluyden in dien tijt ende swoer ende sprac

11

Dese luyden die

[p. k5v]

wt Egipten getrocken zijn van twintich iaren ende daer ouer, die en sullen dat lant nyet sien dat ic Abraham Isaac ende Iacob toe gesworen heb, om dat si mi niet ganselijc na gheuolcht en hebben,

12

wtghenomen Caleb Iephune des Kenesiters sone, ende Iosue Nuns sone, want si hebben den HEERE ganselijck nageuolcht,

13

Also vergramde des HEREN toren op Israel, ende hi leydese alom in de woestine veertich iaer, tot dat al dat gheslachte was vergaen, dat quaet ghedaen hadde voor des HEEREN aensicht.

14

⁺Ende hi seyde, Siet, nv sidi opgestaen in uwer vaderen stede, dat des te meer sondaers zijn souden, dat ghi den toren der gramscapen des HEEREN noch meerder maken soudt tegen Israel,

+ C

15

Ist dat ghi luyden hem niet volgen en wilt, so sal hi v noch langer in de woestine laten, ende ghi luyden sult een sake zijn dat dit volck sal ghedoot worden.

16

Doen quamen si naerder ende spraken, wi sullen comen ende scaepstallen maken voor onse vee, ende vaste steden voor onse kinderen

17

Maer wi sullen gaen gewapent die eerste voor die kinderen van Israel, tot dat wise brengen in haer steden, onse kinderen ende al wat wi hebben mogen, sullen in die besloten steden bliuen om der inwoonders des lants listen ende lagen,

18

Wi en sullen niet weder thuys keeren tot dat die kinderen van Israel ontfangen een yeghelijc zijn erue,

19

want wi en willen niet met hen gheerft worden op dander side des Iordaens, Want onse erue sal op dese side des Iordaens tegent oosten gheuallen zijn.

20

⁺Moyses sprack tot hen luyden, Ist dat ghi doen wilt, ⁺ dat ghi gelouet, ghereet om te strijden voor, den HEERE, so trect ouer de Iordane voor den HEERE,

+ D

+ Iosue. i.f

21

wie dat van v luyden gereet is, tot strijden, tot dat ^* die HERE doodet ende verwint alle zijn vianden)

* the. hi zijn vianden verdrijue van sinen aengesichte.

22

ende dat lant onderdaen worde den HEERE, ^* so suldy) ontschuldich zijn voor den HEERE ende voor Israel, ende ghi sult also dat lant dat ghi begheert, voor v eygen behouden voor den HEERE,

* thebr. daer nae suldy wederkeeren, ende

23

Maer ist dat ghi luyden so niet en doet, so ghi segt, ^* so en is niemant twifelende, dat ghi dan sult v besondighen) aen den HEERE, ende ghi sult uwe sonde bekennen als si v begripen sal,

* the. siet, so suldi v besondighen

24

Daerom timmert nv steden voor v kinderen, ende stallen voor v vee, ende doet dat ghi gheseyt hebt.

25

⁺Ende Rubens kinderen ende Gads kinderen spraken tot Moysen, Wi zijn v knechten, wi sullent doen, so onse heere geboden heeft

+ E

26

Onse kinderen wiuen, haue, ende al ons vee sullen [kolom] wi laten inde steden ^* Galaad)

* th. Gilead

27

Maer wi uwe knechten sullen al bereet trecken totten heyre inden strijdt voor den HEERE, soo ghi mijn heere ghesproken hebt.

28

Doen geboot Moyses den priestere Eleasar ende Iosue Nuns sone, ende den ouersten vaderen der geslachten van Israel, ende sprac tot hen,

29

Ist dat Gads kinderen ende Rubens kinderen met v ouer die Iordane trecken, bereet tot den strijde voor den HEERE, ende als dlant v onderdaen is, so geeft hen dat lant ^* Galaad) om te besitten,

* th. Gilead

30

Maer en trecken si niet ghereet met v, so sullen si met v erue ontfaen int lant Canaan.

31

Rubens kinderen ende Gads kinderen antwoorden ende spraken, so de HEERE spreect tot sinen knechten, so sullent wij doen,

32

wi sullen ghereet trecken voor den HEERE int lant Canaan, ende onse erfgoet belijden ghenomen te hebben om te besitten op dese side des Iordaens.

33

⁺Also gaf Moyses den kinderen Gad, ende den kinderen Ruben, ende den haluen geslachte Manasse Iosephs sone, dat conincrijc ^* Seon) des conincx der Amoriten, ende dat conincrijck Og des conincs tot Basan, dat lant met den steden in alle zijn palen al ronts om,

+ F

* the. Sihon

34

Daer timmerden Gads kinderen Dibon Ataroth, Aroer,

35

Atroth, Sophan, Iaeser, Iegabea,

36

Bethnimra ende Betharan, besloten steden, ende stallen voor haer vee.

37

Rubens kinderen timmerden Ezebon, Eleale, Kariathaim,

38

Nebo Baalmeon, ende veranderden die namen, ende Sibama, ende den steden die si timmerden gauen si namen.

39

Ende Machiers Manasse soons kinderen, ⁺ gingen in ^* Galaad) ende wonnent ende versloegen die Amoriten die daer in waren

+ G

* th. Gilead

40

Doen gaf Moyses Machier Manasses sone ^* Galaad) ende hi woonde daer in

* th. Gilead

41

Iair, Manasses sone ginc ende wan haer dorpen, ende hietse Hauoth Iair, ^* dat is so veel geseyt als de erfhouen Iair)

* ten is niet int heb.

42

Nabo ginc en hi want Knath met alle haere dorpen, ende hi hietse Nabo, na sinen naem.

§ Hier worden ghetelt die plaetsen daer die kinderen van Israel ghelegert hadden, ende haer tenten op geslagen hadden van plaetsen tot plaetsen by name.