De Vorsterman Bijbel

§ Dat .xvi. Capittel.

1

⁺MAer siet, Chore die sone Isaaar, die sone van Caath, die een sone van Leui was ende Dathan ende Abyron die sone van Eliab, ende Hon die sone Pheleph vanden kinderen van Ruben,

+ A

2

stonden tegen Moysen op, met sommighe mannen vanden kinderen van Israel, twee hondert, ende tvijftich mannen ^* ouerste der sinagoghen,) ende die in [kolom] die tijden des raets bi namen gheroepen werden,

* the. hooftluyden der gemeynten.

3

ende als si verghaderden, staende tegen Moysen ende Aaron, spraken tot hen, laet v genoech wesen, dat alle die menichte heylich is, ende die HEERE onder henluyden is waeromme verhefte ghi v ouer dat volck des HEEREN?

4

Als Moyses dat hoorde, viel hi op zijn aensicht,

5

ende sprac tot Chore ende tot alle zijn menichte, Morgen vroech sal de HEERE kenlijc maken, welc die sine zijn, ende diewelcke heylich zijn, sal hi tot hem doen comen, Wie hi verkiest, die sullen tot hem genaken

6

Hierom doet dit, neemt eenyeghelijck wierooc vaten, ghi Chore ende alle uwen aenraet,

7

ende doet vier daer inne, ende doet daer morgen ruecwerck op voor den HEERE, ende so wien die HEERE kiesen sal, die sal heylich zijn, Ghi verheft v te vele, ghi kinderen Leui.

8

⁺Ende Moyses sprack noch tot Chore, Hoort doch ghi Leui sonen,

+ B

9

Ist v niet genoech, dat die God van Israel, v afghescheyden heeft, vanden ghemeynen volcke van Israel, dat ghi comen sout, ende dat ghi doen sout den dienst in den tabernakel des HEEREN, ende sout staen voor die vergaderinge des volcs, ooc om te dienen,

10

Daerom heeft hi v, ende alle uwe broeders die kinderen Leui met v, tot hem laten comen, ende ghi soect nv ooc dat priesterdom,

11

ghi ende alle uwe aenhanghers staet als een cloot, teghen den HEERE, Wie is Aaron, dat ghi teghen hem murmureert?

12

Ende Moyses sandt ende liet Dathan ende Abyron roepen, Eliabs sonen, Si antwoorden, Wi en comen daer niet,

13

Ist niet genoech dat ghi ons wten lande van Egypten gheleyt hebt, daer hoenich ende melc in vloeyt, om dat ghi ons dooden sout in die woestine, ten si dat ghi ooc heerschappie ouer ons hebt?

14

Hoe wel hebdy ons ghebracht in een landt, daer melck ende honich vloeyt, ende hebdt ons, ackers ende wijn berghen tot een erfdeel ghegheuen, Wildy den luyden oock die ooghen wt steken? Wi en comen daer niet.

15

Doen wert Moyses zeer gram, ende sprac totten HEERE, ⁺ En aensiet doch niet haer ^* heylich offere,) Ick en hebbe ooc niet eenen ezele van hen luyden ghenomen, ende ick en hebbe niemanden van henluyden eenich leet ghedaen,

+ C

* th. spijsoffer

16

Ende hi seyde tot Chore, ghi ende alle uwe aenhanghers, staet morgen op die een side, voor den HEERE, ghi ende si ende ooc Aaron,

17

Ende eenyeghelijck neme zijn wieroox vat, ende legghe rueck-

[p. i5r]

werc daer op, ende offert den HEERE twee hondert ende vijftich wieroockuaten, ende Aaron houde zijn wieroockuat,

18

Dwelcke als si ghedaen hadden staende by Moysen ende Aaron,

19

ende si teghen hen vergadert hadden die menichte voor die duere des tabernakels, so heeft die heerlicheyt des HEEREN alle den menschen geopenbaert.

20

⁺Ende die HEERE sprack tot Moysen ende Aaron, segghende,

+ D

21

Scheydet v van deser ghemeynte, dat ickse haestelijck mach ^* verstroyen)

* the. verslinden

22

Ende si vielen op haer aensichte ende spraken, ^* O stercke God) der gheesten van alle vleesche, Oft een man ghesondicht heeft, wildy daeromme toornich zijn op alle die ghemeynte?

* theb. God God.

23

Ende de HEERE sprac tot Moysen segghende,

24

Ghebiedt alle den volcke der ghemeynten ende spreect, Scheydet v van Kore Dathan ende Abirons tenten

25

Ende Moyses stont op, ende ghinc tot Dathan ende Abiron, ende die ouders van Israel volchden hem na,

26

ende sprack totter ghemeynten, segghende, Wijct van dye tenten deser ongodlijcker menschen, ende en raect niet dat hen toebehoort, dat ghy misschien niet en vergaet in eenich van haeren sonden.

27

Ende si ghinghen vanden wooninghen van Kore Dathan ende Abirons, Maer Dathan ende Abiron quamen wt haerder tenten met haeren wiuen, sonen, ende kinderen ^* met alle stadelijcke gheselschap.)

* ten is niet int heb.

28

⁺Ende Moyses sprack, Daer aen suldi mercken dat die HEERE mi ghesonden heeft, dat ic alle dese wercken doen soude, die ghi siet, ende niet en doe van mijnder eyghen herten,

+ E

29

Ist dat si steruen so alle menschen steruen, oft besocht met eeniger plagen, gelijc alle menschen besocht worden, soo en heeft mi die HEERE niet gesonden,

30

Maer doet die HEERE yet nieus, so dat die aerde haren mont op doet, ende verslintse met allen dat si hebben, ende dalen si neder waert totter hellen leuendich, so suldy weten dat dese luyden, den HEERE ghelachtert hebben.

31

Ende ter stont als Moyses dese woorden alle voleyndet hadde, so schuerde die aerde onder hen

32

ende dede haeren mont op, ende verslontse, met haeren tenten, met alle den menschen die bi hen waren, ende met alle haer haue,

33

ende daelden leuendich onder totter hellen, met al dat si hadden, ende die aerde ouerdectese, ende si verghingen vander gemeynten,

34

Ende die van Israel die al om hen stonden, vloden van haeren gheroepe dier verghinghen, seggende, dat ons die aerde oco [kolom] niet en verslinde.

35

⁺ Ende dat vier quam ooc wt vanden HEERE ende verslinde die twee hondert ende vijftich mannen, die dat rueckweerck offerden om te onsteken ende bernen.

[afbeelding]

+ Psal. ciij.

36

Ende die HEERE sprack tot Moysen seggende,

37

Segt Eleasar Aarons des priesters sone, ⁺ dat hi die wieroockuaten wech neme ende opheffe wten brant, ende stroye dat vier hier ende daer, want si zijn geheylicht door de doot der sondaren,

+ F

38

datmen daer platen af slae ende die vast beslae aenden outaer, om dat si gheheylicht zijn, ^* ende daer in wieroock, den HEERE geoffert is) om datse die kinderen van Israel sien sullen voor een teeken, ende vermaninghe der ghedachten.

* the. want si zijn gheoffert ende geheylicht den HEERE

39

Ende Eleasar die priester, nam dye metalen wieroocuaten, daer de verbrande in geoffert hadden, ende sloeger platen af, den outaer mede te beslaen,

40

tot een gedachtenis den kinderen van Israel, dat niemant vremders, die niet en is van Aarons zade comen en soude om te offeren ruecwerc voor den HEERE, op dat hem nyet en gesciede so Kore ende sinen mede plegeren, so de HEERE hem geseit hadde door Moysen.

41

⁺Maer des anderen daechs murmureerde alle die menichte der kinderen van Israel, tegen Moysen ende Aaron, ende spraken Ghi hebt des HEREN volc gedoot,

+ G

42

Ende doen den twiste oprees ende den oploop wies,

43

soo vloden Moyses ende Aaron totten tabernakel des verbonts, Als si daer in gheghaen waren, doen bedecte dye wolcke, den tabernakel, ende dye heerlickheyt des HEEREN

[p. i5v]

openbaerde,

44

Ende die HEERE sprack tot Moysen segghende,

45

Gaet wt den middele van deser menichten, Want nv oock sal icse te niet doen, Ende doen si op der aerden laghen,

46

seyde Moyses tot Aaron, Neemt dat wieroocuat, ende als ghi vier vanden altar ghenomen hebt, so legt daer op wieroock, ende andere specerien, om te aensteken, ende ghaet gheringhe tot den volcke, ende bidt voor hen, Want die gramschap is nv vanden HEERE wtgheghaen, ende die plaghe is wreedelijck aen geghaen den volcke,

47

Ende als Aaron gedaen hadde also, liep hi midden onder die gemeynte, die nv den brant vernielde, ende hi offerde ruecwerc,

48

ende stont tusschen den dooden ende den leuenden, ende badt voor tgemeyn volck, ende die plaghe hielt op.

49

Die met dier plaghen gestoruen waren, waren veerthien duysent, ende seuen hondert, wtgenomen, die in Chore muterie ghestoruen waren.

50

Ende Aaron quam weder tot Moysen, voor die duere des Tabernakels des verbonts, na dat die plaghe ophielt.

§ Hoe die kinderen van Israel twaelf roeden naer elcke gheslachte namen, waer wt dat Araons roede bloemde, ende droech Amandelen tot eenen teeken, dat God hem vrcoren hadde.