De Vorsterman Bijbel

§ Dat .iij. capittel.

1

⁺DIt zijn Moyses ende Aarons gheslachten, doen die HEERE met Moysen sprack, in dien tijde opten berch Sinai.

+ A

2

Ende dit zijn die namen van Aarons sonen, zijn eerste gheboren was Nadab, daer na Abihu, Eleasar ende Ithamar,

3

Dat zijn die namen van Aarons sonen, die Priesters ghesalft waren, ende haer handen ghewijt totten Priesterdom, ⁺

+ Leui. x.a. Nu. xxvi a

4

Maer Nadab ende Abihu storuen voor den HEERE, doen si vremt vyer offerden voor den HEERE inder woestijnen Sinai, ende en hadden gheen sonen, Maer Eleasar ende Ithamar bedienden dat Priester-[kolom]schap met haeren vadere Aaron.

5

Ende die HEERE sprack tot Moysen, segghende,

6

Doet comen dat gheslachte Leui, ende steltse voor den Priester Aaron, dat si met hem dienen,

7

ende haer ende der gheheelder ghemeynten waeck houden, voor den Tabernakel des ghetuychnis, ende dienen inden dienst des Tabernakels,

8

ende wachten alle die ghereeschap des Tabernakels des ghetuychnis ende die bewaringhe der kinderen van Israel te dienen inden dienst des Tabernakels,

9

Ende sult die Leuiten,

10

Aaron ende sinen sonen tot eender ghiften gheuen, eenen yeghelijcken die sine vanden kinderen van Israel. Aaron ende sine sonen suldy setten dat si haers Priesterdoms waernemen, Een vremde die om te dienen gaet, die sal die doot steruen.

11

Ende die HEERE sprack tot Moysen, segghende,

12

⁺Siet, ick heb die Leuiten ghenomen onder die kinderen van Israel, voor alle eerste gheboren die die moeder ontdoen onder die kinderen van Israel, also dat die Leuiten sullen mijn zijn,

+ B

13

Want die eerste gheboren zijn mijn van dier tijt dat ick sloech alle eerste gheboren in Egypten lant, doen heylichde ick mi alle eerste gheboren in Israel, vanden menschen aen totten vee toe, datsi mijn zijn sullen, Ick die HEERE.

14

Ende die HEERE sprack in die woestyne Sinai met Moysen, segghende,

15

⁺Telt die kinderen Leui na haerder vaderen huysen ende gheslachten, al wat manlijck is van eender maent oudt, ende daer ouer. ⁺

+ C

+ Exo. iij.a. Nu. viij.c.

16

Also teldese Moyses na die woorden des HEEREN, so hi gheboden hadde.

17

Ende dit waren die namen der kinderen Leui, Gerson, Kahad, Merari,

18

Die namen van Gersons kinderen in haeren gheslachte waren, Libni ende Semei.

19

Die kinderen van Kahath in haeren gheslachte waren Amram, Iezahar, Hebron ende Vziel.

20

Merari kinderen waren in haeren gheslachte Maheli ende Musi. Dit zijn die gheslachten van Leui, na haerder vaderen huysen.

21

⁺Dit zijn die gheslachten van Gerson. Die Libniten ende Semeiten,

+ D

22

die somme wert by den ghetale, seuen duysent ende vijfhondert, al dat manlijck was een maent oudt ende daer ouer.

23

Ende dat selue gheslachte der Gersoniten sal sinen leger maken achter den tabernakel tegen dat westen,

24

haer ouerste sal zijn Eliasaph Laels sone,

25

Ende si sullen waken aenden Tabernakel des getuychnis,

26

die Tabernakel ende die tente ende haer decsel, ende den doec in de duere destabernakels des ge-

[p. h5v]

tuychnis dat voorhanghende cleet aen den voorhof, ende den doeck in die duere des voorhofs, al dat alomme den tabernakel ende alom den outaer gaet, ende zijn zeelen, ende al wat tot sinen dienste behoort.

27

⁺Dit zijn Kahats gheslachten, die Amramiten, die Iizehariten, die Hebroniten, ende Vzieliten,

+ E

28

dat manlijck was een maent oudt ende daer ouer, by den ghetale acht duysent, ende ses hondert, die die wake des heylichdoms houden,

29

ende sullen haeren legher maken aen die syde des Tabernakels teghen die zuytzyde,

30

haer ouerste sal zijn Elizaphan Vziels sone,

31

Ende si sullen wachten die Arcke, die tafel, den candelaer, die outaren ende alle die ghereeschap des heylichdoms, daer si aen dienen, ende den doeck ende wat tot sinen dienste behoort,

32

Maer die ouerste bouen alle die ouersten der Leuiten sal Eleasar zijn Aarons sone des Priesters, ouer die ghene die daer ghecoren zijn te bewaren die wake des heylichdoms.

33

Dit zijn Merari gheslachten, die Maheliten, ende Musiten,

34

die inden ghetale waren ses duysent, ende twee hondert, al wat manlijck was een maent oudt ende daer ouer,

35

haer ouerste sal zijn Zuriel Abihail sone, ende sullen haeren legher maken aen die syde des Tabernakels teghen dat noorden,

36

Ende si sullen in haer behoet hebben, die barderen ende rijchelen, ende calomnen ende die voeten des Tabernakels ende alle zijn gereescap ende sinen dienste

37

Daer toe oock die calomnen al om den voorhof, met den voeten ende naghelen ende zeelen.

38

⁺Maer voor den Tabernakel, ende voor die Tente teghen den oosten sullen Moyses ende Aaron ende zijn sonen haeren legher maken, dat si dat heylichdom wachten onder die kinderen van Israel, Als een vremdelinck daer onder gaet, die sal die doot steruen.

+ F

39

Alle dat ghetal der Leuiten die Moyses ende Aaron telden bi haeren gheslachten, na dat woort des HEEREN al dat manlijck was van eender maent ende daer ouer, was twee ende twintich duysent.

40

Ende die HEERE sprac tot Moysen, Tellet alle die eerste gheboren van mans maecsele onder die kinderen van Israel, een maent oudt ende daer ouer, ende neemt dat getal haerder namen,

41

Ende die Leuiten suldy mi den HERE wtnemen voor alle die eerste gheboren der kinderen van Israel, ende der Leuiten vee voor alle eerste gheboren des vees der kinderen van Israel.

42

Ende Moyses telde so hem die HEERE gheboden hadde, alle deerste [kolom] gheboren onder die kinderen van Israel,

43

Ende men vant inden ghetale der namen alder eerste gheboren wat manlijck was, een maent oudt ende daer ouer inder sommen twee ende twintich duysent twee hondert ende .lxxiij.

44

Ende die HEERE sprac met Moysen segghende,

45

Neemt die Leuiten voor alle eerste gheboren onder die kinderen van Israel, ⁺ ende dat vee der Leuiten voor haer vee, dat die Leuiten mijn des HEREN zijn,

+ G

46

Maer dat losghelt, ⁺ vanden twee hondert ende drie ende tseuentich, die vanden eerst gheboren der kinderen van Israel te bouen gaen dat ghetal der Leuiten,

+ Nu. viij.c.

47

suldy vijf sikel nemen van elcken hoofde, naden sikel des heylichdoms (twintich Gera doet eenen sikel),

48

Ende ghi sult dat selue ghelt dat daer so ouercomende is, ouer haer ghetal, Aaron ende sinen sonen gheuen.

49

Aldus nam Moyses dat losghelt, datter ouer quam, bouen der Leuiten ghetal

50

vanden eerste gheboren der kinderen van Israel, ⁺ duysent drie hondert ende vijf ende tseuentich sikels na den sikel des heylichdoms,

+ Exod. xxx. Leu. xviij.c Eze. xlv.d.

51

ende ghaft Aaron ende sinen sonen na den woorde des HEEREN, so die HEERE Moysi gheboden hadde.

§ Hoe die Leuiten worden ghetelt, ende elck aen sinen dienst ghestelt, elck na zijn gheslachte, om den Tabernakel te wachten.