De Vorsterman Bijbel

§ Dat .xxiij. Capittel.

1

⁺ENde die HEERE sprack tot Moysen segghende.

+ A

2

Segt den kinderen van Israel, ende spreect tot hen. Dit zijn die feesten des HEEREN die ghi heylige dagen heeten sult.

3

Ses daghen suldi werc doen, maer den seuensten dach, is dye ruste des Sabboths, ende sal heilich heeten, gheenderhande werck en suldi daer inne doen, want het is die Sabboth des HEEREN, in alle plaetsen waer dat ghi woont.

4

Dit zijn die feesten des HEEREN dye heilich zijn, die ghy in haeren tijden vieren sult.

5

Den .xiiij. dach des eersten maents, tsauonts is des HEREN Paesschen,

6

ende inden vijfthiensten der seluer maent, is die feeste der ongheheefder brooden des HEEREN, Dan suldy seuen daghen ongeheeft broot eten.

7

Den eersten dach sal heylich ghenaemt worden onder v, daer inne en suldy gheen dienstwerck doen,

8

ende den HEERE offeren offerhande inden viere seuen daghen lanck. Den seuensten dach sal heyligher ende die meest feestdach genaemt zijn daer inne en suldi gheen dienstelijcke wercken doen.

9

⁺Ende die HEERE sprack tot Moysen segghende,

+ B

10

Segt den kinderen van Israel, ende spreeckt tot hen. Als ghi int lant coemt, dat ic v gheuen sal, ende sult oochsten, so suldi eenen schoof der eerster vruchten ws oochsts totten priestere brenghen,

11

die sal dien scoof opheffen voor den HEERE, dat hi aengenaem worde voor v. Des anderen daechs na den Sabboth sal die priester dat doen, ende

[p. h1r]

salt heylich maken.

12

Ende ghi sult inden daghe als uwen schoof gheheuen wort, een brantoffer den HEERE doen, van een lammeken dat sonder smette is, ende dat iarich is,

13

met den spijsoffer twee thiende deelen bloemen meels, met olie ghemengt tot eenen offer den HEERE, tot eenen soeten rueck, daer toe ooc den drancoffer, een vierendeel van een Hin wijns,

14

Ende ghi en sult geen broot noch koecken, noch pappe eten tot opten dach als ghi uwen Gode offeren sult, Dat sal een ghebot zijn uwen nacomelingen in allen plaetsen waer dat ghi woont

15

⁺Daer na suldi tellen vanden anderen dagen des sabboths, daer ghi die schoouen der eerster vruchten in geoffert hebt, seuen geheele weken,

+ C

16

tot des anderen daechs des seuenden sabboths, te weten, Vijftich dagen suldi tellen, ende nieuwe spijsoffer den HERE offeren,

17

ende wt allen uwen wooningen suldijt offeren, te weten, twee brooden der eerster vruchten van twee thiende bloemen meels gheheeft ende ghebacken, tot eerste vruchten den HEERE,

18

Ende ghi sult daer oock brenghen met uwe broot seuen iarige lammeren sonder smette, ende een ionghe calf vanden runderen, ende twee rammen, ende dese sullen met hueren vochtigen offerhanden eenen brantoffer wesen den HEERE, tot eenen aldersoetsten ruecke, Dat is een offer, eenen soeten rueck den HEERE.

19

⁺Ende ghi sult eenen bock dooden voor die sonde, ende twee iarighe lammeren, voor een offerhande der vreedsamigher,

+ D

20

Ende alst die priester sal opgeheuen hebben voor den HEERE, op dat broot der eerstelinghen tot den twee lammeren, soo salt den HEERE heylich, ende des priesters deel zijn,

21

ende sult desen dach wtroepen, want hi sal onder v heylich ghenaemt zijn, gheen dienstwerc en suldi doen, Een eewich recht sal dat zijn bi uwen nacomelinghen, waer dat ghi woont.

22

Als ghi v lant oostet, en suldijt niet altemael maeyen, noch die arenen die daer bliuen liggen, en suldy niet vergaderen, maer ghi sullet den armen ende den vremdelinghen laten, Ick ben die HEERE v Godt.

23

⁺Ende die HEERE sprack tot Moysen segghende,

+ E

24

Segt den kinderen van Israel, Inden eersten daghe der seuenster maent suldi hebben den heylighen vierdach, ^* des ghedachtenis, ende die trompetten sullen slaen)

* the, des gedencblasens.

25

daer inne en suldi gheen dienstwerck doen, ende sult den HEERE offer doen. [kolom]

26

Ende die HEERE sprack tot Moysen, segghende,

27

Den thiensten dach van deser seuenster maent, is den alderfeestelicsten dach der versoeninghen, die sal v heylich ghenaemt worden, In dien dage suldi uwe ziele verootmoedigen, ende den HEERE offerhanden om gheheele te verbranden offeren,

28

ende ghi en sult gheen dienstwercke doen in desen daghe, want het is versoendach, dat ghi versoent wort voor den HERE uwen Godt,

29

⁺Want soo wat ziele haer niet verootmoediget in desen dage, die sal van haeren volcke vergaen.

+ F

30

Ende wat ziele in desen dage eenich werck doet, die sal ic te niete doen van haeren volcke,

31

Daeromme en suldi geen werc doen in dien daghe, Dat sal een eewich recht zijn uwen nacomelingen, waer dat ghi woont,

32

Het is ws sabboths ruste, ghi sult v zielen verootmoedighen, Inden negensten dage deser maent, tsauonts suldi dit vieren houden, vanden eenen auont totten anderen auont.

33

Ende die HERE sprac tot Moysen, seggende,

34

Spreect metten kinderen van Israel, ende segt, Vanden vijfthiensten dage van deser maent, sal die feeste der loouertenten wesen totten seuensten daghe den HEERE, ⁺

+ Op desen dach ist dat men den armen te dienen plach.

35

Den eersten dach sal heylich genaemt zijn, geen dienstwerck en suldi daer inne doen,

36

Seuen daghen suldi den HEERE offeren, Den achtsten dach sal oock heylich genaemt zijn ende ghi sult uwen offer den HERE doen, want het is den dach der vergaderinghen, ende des samen brenghingen, geen dienstwerck en suldi daer inne doen.

37

Dit zijn die vierdagen des HEEREN, die ghi heylich sult wtroepen, daer ghi den HERE offer in doen sult, brantoffer, spijsoffer, drancoffer, ende ander offeren, yegelijck na die maniere van sinen dage,

38

⁺sonder doffer des sabboths des HEEREN, ende v ghauen ende geloften, ende vriwillighe gauen, die ghi den HEERE gheeft.

+ G

39

So suldi dan den vijfthiensten dach der seuenster maent als ghi die incomende vruchten vanden lande inghebracht hebt, die feeste houden den HEERE seuen daghen lanck, Ten eersten dage salmen vieren, ende ten achsten daghe salmen ooc vieren,

40

Ende ghi sult ten eersten daghe vruchten nemen van schoouen, boomen, palmen riseren, ende meyen van boomen met dicke breede bladeren, ende wilgen vander beken, ende seuen dagen vrolijck zijn voor den HERE uwen Godt,

41

ende ghi sult den HERE also des iaers

[p. h1v]

die feeste houden seuen daghen, dat sal een eewich recht zijn by uwen nacomelinghen, dat si in die seuenste maent also vieren,

42

Seuen dagen suldi in die loouer ^* tenten) woonen Wie datter een ingheboren in Israel is, die sal in die loouertenten woonen,

* th. hutten

43

dat uwe nacomelinghen weten mogen, hoe ic die kinderen van Israel in ^* tenten) heb laten woonen, doen icse wt Egypten lant leyde, Ic ben die HERE v God,

* th. hutten

44

ende Moyses sprac totten kinderen van Israel, van desen vierdagen des HEREN

§ Hoemen dat licht des candelaers toebereyden moeste, Ende vanden thoonbrooden, Van die pene des lasteraers Gods, ende die pene, so hi den anderen gedaen heeft sal hem geschieden voor een recht.