De Vorsterman Bijbel

§ Dat .x. Capittel.

1

⁺ENde Aarons sonen Nadab ende Abihu, namen een yeghelijck zijn wieroocuat, ende deden vier daer inne, ⁺ ende leyden wierooc daer op, ende offerden vreemdt vyer voor den HEERE, dat hen lieden niet gheboden en was.

+ A

+ Leui. xvi.g Num. iij.a. ende. xxvi.g. Psal. cv. i.pa. xxvi.a

2

Doen ghinck daer een vyere vanden HEERE, ende verslontse,

[p. g2r]

ende si storuen voor den HERE,

3

Doen sprac Moyses tot Aaron, Dat ist, dat die HERE geseyt heeft, Ick sal geheylicht worden aen den ghenen die my genaken, ende int aensicht van alle den volcke sal ic heerlick gheeert worden, Ende Aaron sweech stille als hi dit hoorde.

4

Ende Moyses, als hi gheroepen hadde Mizael ende Elisaphan, Oziels, Aarons ooms sonen, sprac hi tot hen, Ghaet, ende neemt wech uwe broeders vanden aensichte der heyligher plaetsen, ende draechtse wech buyten den leghere,

5

Ende si ginghen terstont, ende namense ghelijck si lagen gecleet met lijnen rocken, ende droeghense buyten, ghelijck hen was gheboden.

6

⁺Ende doen sprac Moyses tot Aaron, ende sinen sonen Eleazar ende Ithamar, En wilt uwe hooft niet ontdecken, Noch uwe cleederen niet schueren, op dat ghy nyet en sterft, ende die toren ouer die gantse ghemeynte come, laet uwe broederen van alle den huyse van Israel weenen ouer desen brant, die die HEERE verwect heeft,

+ B

7

maer ghy en sult nyet wtghaen vander dueren des tabernakels, ^* oft anders suldi verghaen) Want die olie der heyliger saluinghe is op v, Ende si dedent al na Moyses beuel.

* the. op dat ghi nyet en sterft.

8

Ende die HEERE sprac tot Aaron, ⁺

+ Hyer wert den priesteren verboden wijn, ende alle dranc die eenen mensche beswaret.

9

Ghi ende v sonen met v, en sult gheenen wijn, noch al dat yemant droncken maken mach drincken, als ghi in den tabernakel des getuychnis ghaet, op dat ghi nyet en sterft, Dat sal wesen een eewich recht allen uwen nacomelingen,

10

Op dat ghi moecht onderscheiden, wat heylich ende onheylich is, wat onreyn ende reyn is,

11

Ende dat ghy den kinderen van Israhel leert alle die rechten, die die HEERE tot v ghesproken heeft door Moysen.

12

⁺Ende Moyses sprac tot Aaron, ende sinen ouergebleuenen sonen Eleazar ende Ithamar, Neemt die heylighe offerande die ouer ghebleuen is vanden offer des HEEREN, ende etet, ongeheeft biden outaer, want het is dat alderheylichste der heylighen,

+ C

13

ende ghi sullet in een heylighe plaetse eten, Want dat is v ghegheuen, ende uwen sonen vanden offere des HEEREN, so my dat geboden is,

14

Maer die borst die op geheuen is, ende die scoudere die versceyden ghegheuen is suldi ende uwe sonen, ende uwe dochteren met v eten in een suyuer stede, Want ^* dese dingen zijn gehouden v ende uwe kinderen) van den heylsamen offeren der kinderen van Israel,

* th. alsulcken recht is v, ende uwen kinderen gegeuen.

15

om dat die schoudere ende dye borst, ende dat vet datter verbrant wort opten outaer si opghehe-[kolom]uen voor den HEERE, ende v toebehoore, ende uwen kinderen door een eewighe wet, gelijckerwijs die HEERE geboden heeft, ⁺

+ ij.Mac. ij.c

16

⁺Onder dese dinghen, als Moyses socht den bock die voor die sonden gheoffert was, soo vant hi hem verbrant, ende hy wert toornich op Eleazar, ende Ithamar, Aarons sonen, die noch ouergebleuen waren, ende sprac,

+ D

17

Waer omme en hebdi den offer voor dye sonde nyet gegheten in die heylige plaetse? want het is dat alderheylichste der heylighen, ende het is v gegeuen dat ghi die misdaet der gemeynten dragen sout, ende bidden voor haer int aengesichte des HEEREN,

18

Bisonder, want van dat bloet en is niet gedragen in dye heylige plaetse, ghi soudet in die heylige plaetse gegheten hebben, soo alst mi gheboden is,

19

Aaron antwoorde, Heden is die offerande voor die sonde, ende den brantoffer voor den HERE gheoffert, Ende het is mi gheschiet also ghi siet, Hoe mocht ic die eten, oft behaghen den HEERE in ceremonien des godliken dienst met ^* bedroefden ghedachten?

* § Anders met bedroefder herten.

20

Doen Moyses dat hoorde, liet hijt hem genoeghen.

§ Van die suyuere ende onsuyuere dieren, die welcke de ioden eten ende niet eten mochten.