De Vorsterman Bijbel

§ Dat .xl. Capittel.

1

⁺ENde dye HEERE sprack tot Moysen segghende,

+ A

2

Ghy sult den Tabernakel der tenten der ghetuyghenissen oprechten, inden eersten daghe der eerster maent,

3

Ende ghy sult dye arcke des ghetuyghenissen daer inne laten setten, ende dat voorcleedt voor die arcke laten hanghen,

4

Ende ghi sult die tafele daer in brenghen, ende stellen daer op alle haer ghereeschappen. Ende den kandelaer sal daer staen met dye luchters.

5

Ende den gulden rueck outaer, daermen op verbrant wel rieckende dinghen, suldy voor die Arcke des ghetuyghenisse setten, Ende in dye duere des Tabernakels suldi dat cleet hangen,

6

Den outaer des brantoffers, suldy setten voor dye duere vanden Tabernakel der tenten des ghetuyghenissen,

7

Ende dat water vat met sinen voete suldy setten, tusschen den tabernakel der ghetuyghenissen, ende tusschen den outaer, ende doen daer watere inne,

[p. f5v]

8

Ende ghi sult den vrijthof omhanghen metten gordinen ende sinen inganck.

9

Ende ghi sult die salfolye nemen, ende den Tabernakel ende al dat daer in is saluen, dattet heylich si,

10

op dat den outaer des brantoffers met alle sinen vaten gheheilicht worde

11

⁺dat hi si dat heylich der heyligher plaetsen, Dat water vat met sinen voete suldy oock saluen ende wijen.

+ B

12

Ende ghi sult Aaron ende zijn sonen voor de dore des tabernakels des getuygenis brengen ende als ghise met water gewasschen hebt,

13

so sult ghise de heilige cleederen aentrecken dat si mi dienen, ende haer saluinghe ^* voortgae in een eewelijck priesterscap in profitelicheit)

* the. sullen si tot een eewich priesterdom bi haer nacomelinghen hebben

14

Ende Moyses dedet alsoo als hem die HEERE gheboden hadde.

[afbeelding]

15

Aldus wert den tabernakel opgerecht int tweede iaer inden eersten dach der eerster maent,

16

Ende als Moyses dat oprechte, stelde hi die voeten, ende die barderen ende rijchelen, ende hi rechte op die calomnen,

17

ende spreyde dye tente wt bouen den tabernakel, ende hi leide dat decsel der tenten bouen daer op, soo die HEERE hem gheboden hadde.

18

Ende hi nam dat ghetuyghenis ende leydet in die arcke ende hi dede die hantboomen aen die arcke, ende hi dede ^* die plaetse der antwoorden) bouen op die arcke,

* the. den genaden stoel.

19

⁺ende hi bracht die arcke inden tabernakel ende hi hinc die gordine voor de arcke des getuygenis, om te volbrengen dat hem de HEERE geboden hadde. [kolom]

+ C

20

Ende hi stelde die tafel, in den tabernakele des getuygenis in deen side vanden Tabernakel noortwaert, buyten voor dat voorhangende cleet,

21

ende hi bereyde dat broot daer op voor den HEERE, so die HEERE Moysi gheboden hadde.

22

Ende hi sette den candelaer ooc daer in teghen die tafele ouer, in die zuyt side des tabernakels,

23

ende hi stelde in ordinancie de lampe voor den HEERE, So hem de HEERE geboden had,

24

Ende hi sette den gulden outaer daer inne, onder dat dack des ghetuyghenisse tegen dat cleet,

25

Ende hi maecte rueck daer op, ontsteken specerie van goeden ruecwerc, So hem die HEERE geboden hadde

26

Ende hi hinck dat cleet inden inganck des tabernakels des getuygenis, ⁺ Ende den brantoffer outaer, sette hi voor dye duere vanden tabernakel der tenten des getuyghenis,

+ D

27

ende hi offerde daer op brantoffer ende spijsoffer, Soo hem dye HEERE gheboden hadde,

28

Ende dat wateruat stelde hi tusscen den tabernakel des ghetuyghenis ende den outaer, ende hi dede water daer inne om te wasschen,

29

Ende moyses ende Aaron ende zijn sonen wiesschen haer handen ende voeten daer in,

30

als si in den tabernakel des ghetuyghenis gaen souden, oft totten outaer comen, so hem die HEERE gheboden hadde.

31

Ende hi rechte den voorhof op ront om den tabernakel inden omganck, ende om den outaer alomme, ende hy spreyde tcleet aenden inganc. Als voleyndet was alle dat werck

32

doen bedecte een wolcke den tabernakel des ghetuyghenis, ende die heerlicheyt des HEEREN veruulde den tabernakel,

33

ende Moyses en conde in die tente des getuygenis niet gegaen, de wijle dat die wolcke daer alle dinck bedecte, ende dye heerlicheyt des HEEREN in dye wooninghe claerlijcken scheen.

34

Ende alst gheuiel, dat die wolcke den tabernakel liet, dan trocken die kinderen van Israel ende reysden met haer heyrscaren,

35

Als die wolcke hinc daer bouen, dan en reysden si niet, tot dien daghe toe dat si haer ophief,

36

want dye wolcke des HEEREN was des daechs op den tabernakel, ende des nachts wasser vier daert alle dat volck van Israel aensaghen door alle haere wooninghen.

§ Hier eyndet Exodus, dat boec des wtgancx, dat tweede boec Moysi.