De Vorsterman Bijbel

§ Dat .xxxviij. Capittel.

1

⁺ENde hi maecte des brantoffers outaer van vueren houte, vijf cubitus lanck ende breet int viercant, ⁺ ende drie cubitus hooge

+ A

+ ij.Para. i.

2

Wiens hoornen daer wt quamen vanden vier hoecken, ende ouerdecten met metalen platen,

3

Ende hi maecte alderley ghereescap van metael tot des outaers ghebruyc, siepotten, scuppen, becken, crauwels, vyerpannen,

4

Ende hy maecte aenden outaer [kolom] eenen rooster, ghelijck een nette, van metale, ^* ende onder dien int middele des outaers een vloerken)

* the. al omme van onder op, tot aen de helft des altars

5

ende hi goot vier ringhen aen die vier hoecken des metalen roosters tot den hantboomen,

6

Die selue maecte hi van vueren houte, ende ouertrocse met metalen platen,

7

ende hi dedese in die ringhen dye aen die siden des outaers ^* wtstaken) Maer den outaer en was niet dicht, maer van gehouwen barderen bi een gheuoecht binnen hol

[afbeelding]

* the. wtstaken datmen hem daermede droech.

8

En hy maecte dat wateruat met sinen voeten van metale ^* van dye spiegelen der vrouwen) die voor die dueren des tabernakels te waken pleghen.

* the. Op de plaetse der Heerinnen

9

Ende hi maecte den voorhoue teghen dye zuydt side een voorhanghende cleedt hondert cubitus lanck van ghetweernder witter siden, ⁺

+ i.Reg. ij. i.Timo. v. Luce. ij.

10

⁺met haeren twintich calomnen ende twintich voeten van metale, maer de hoofden ende tghesneden werck van siluere,

+ B

11

des selfs ghelijcken tegent noorden, hondert cubitus met twintich calomnen, ende twintich voeten van metale, maer haer hoofden ende dat ghesneden werck van siluere,

12

Maer in die side die westwaert siet, waren cleederen van vijftich cubitus met thien calomnen ende thien voeten van metale, maer haer hoofden ende verheuen werc van siluer,

13

Maer tegen den oosten bereyde hi cleederen van vijftich cubitus,

14

Vijfthien op elcke side der poorten aen den voorhof met drie calomnen,

15

ende drie voeten,

16

dat alle die ghespannen cleederen des voorhofs waren van witter ghetweernder

[p. f4v]

siden,

17

ende die voeten der calomnen van metale, ende haer hoofden, ende tghesneden werck van siluere, alsoo dat haer hoofden ouertrocken waren met siluere, maer tghesneden werck was silueren, ende alle die calomnen des voorhofs ouerdecte hi met siluere.

18

Ende inden inganc des vrijthofs maecte ⁺ hi met berduerwerck een cleet, ghestict met gheelder siden, purpur, rosetroot, tweemael gheuerwet, ende ghetweernder witter siden, twintich cubitus lanck, ende vijf cubitus hooge, naer die mate des hangenden cleets des voorhofs,

+ C

19

Daer toe ooc vier calomnen met vier voeten van metale, ende haer hoofden van siluereende die coppen, ende tgesneden werck ouertrocken met siluere,

20

Ende alle die nagelen des tabernakels, ende des voorhofs rontomme waren van metale.

21

Dit is nv die somme der gereeschappen vanden tabernakule des ghetuygenis, die ghetelt is, naer Moyses gebot, totten Godes dienste der Leuiten, onder die hant Ithamar Aarons des priesters sone,

22

die Bezeleel die sone Vri des Hurs sone vanden geslachte Iuda maecte, alsoo die HEERE Moysi gheboden hadde.

23

Ende hem is toeghesedt tot eenen gheselle ⁺ Ahaliab, die sone Achisamach, vanden geslachte Dan, ende oock was hi een constelijck meester van snijden, van te wercken, ende berduerwerck te sticken wt gheelder siden, purpur, rotseroot, tweemael gheuerwet ende witter siden.

+ D

24

Alle dat gout dat ghewrocht is in allen desen wercke, der heyligher plaetsen, dat daer tot offeren gegeuen wert, dat is negenentwintich talenten, seuen hondert, ende dertich sikel, naer den sikel des heylichdoms

25

^* Maer dit is geoffert vanden ghenen die ouergeghaen zijn totten ghetale van twintich iaren, ende daer ouer, van ses hondert duysent, ende drie duysent, ende vijf hondert, ende vijftich gewapende strijtbaer mannen.)

* th. tghetal des siluers dat vander gemeynten quam, was hondert talenten, duysent, seuen hondert, ende lxxv. sikels naden sikel des heylichdoms, So menich hooft, soo menige halue sikel, naden sikel des heylichdoms van allen, die ghetelt werden, van twintich iaren, ende daer ouer, seshondert maele duysent .iij dusent .ccccc ende .l.

26

Daerenbouen warender hondert talenten siluers, daer af gootmen die voeten der heyligher plaetsen, ende die voeten des voorgespannen cleets,

27

hondert voeten van hondert talenten, een talent tot eenen yegelijcken voet ghetelt,

28

Maer van die duysent seuen hondert, ende vijf ende tachtentich sikels werden gemaect, die hoofden der calomnen die hi oock met siluer ouerdecte.

29

Des metaels is geoffert seuentich duysent talenten ende daerenbouen vier hondert sikel,

30

daer af werden gegoten die voeten in dien inganc [kolom] des tabernakels des getuygenis, ende den metalen altaer metten metalen rooster daer aen, ende alle die ghereeschap daer toe behoorende,

31

ende oock die voeten des voorhofs rontomme, ende die voeten der poorten des voorhofs ende alle die naghelen des tabernakels, ende alle die naghelen des voorhofs rontomme.

§ Van Aarons cleederen, vanden lijfroc die op sen scouderen quam.