De Vorsterman Bijbel

§ Dat .xxxv. Capittel.

1

⁺ENde Moyses vergaderde alle die ghemeynte der kinderen van Israel, ende sprack tot hen, Dat ist dat die HERE geboden heeft, dat ghi doen sult,

+ A

2

Ses dagen suldi wercken, den seuenden dach suldi heylich houden, den sabboth der rusten des HEREN, Soo wie dat eenich werck daerinne doet, die sal ghedoot worden,

3

Ghi en sult gheen vier aensteken inden sabboth dach, in allen uwen wooningen.

4

Ende Moyses sprack tot alder gemeynten der kinderen van Israel, Dit ist dat die HERE gheboden heeft,

5

Ghy sult afscheyden onder v ^* die eerste vruchten) den HERE, alsoo dat een yeghelijck wt vrijer herten brenghe den HERE, Gout, siluer, metael,

* h. hefoffer Daerom hiet hefoffer, om datment recht ophief.

6

goubloemen side, purpur, paerse side tweemael geuerwet, witte side, ende geyten har,

7

roode rams vellen, goubloemuerwige vellen,

8

ende vueren hout,

9

olie totter lampen, ende [kolom] specerie tot salfolie, ende tot goede ruecwerc,

10

Onix ende zeer dierbaer gesteente tot den lijfrock die den scouderen bedect, ende totten borstlap der redelicheyt.

11

⁺Ende so wie onder v wijs van herten is, die come, ende make dat die HEERE gheboden heeft,

+ B

12

te wetene, den tabernakel met zijnder tenten, ende decsel, ringen, barderen, richelen, calomnen, ende voeten,

13

Die arcke met haeren hantboomen, den stoel ^* der antwoorden,) ende dat voorhancsel,

* ht. genaden

14

Die tafel met haeren hantboomen, ende alle haer ghereeschap, ende met dat thoonbroot,

15

Den candelaer omme te lichten, ende zijn gereescap, ende zijn lampen, ende die olie tot den lichte te voeden,

16

Den ruecaltaer met sinen hantboome, Die salfolie ende specerie tot den ruecwercke, Dat cleet voor die duere des tabernakels,

17

Den brantoffer outaer met sinen metalen rooster, hantboomen, ende alle zijn ghereescap, Dat wateruat met sinen voete,

18

Die gordinen des voorhofs met sinen calomnen ende voeten ende dat cleet der dueren aent voorhof,

19

Die spannagelen des tabernakels, ende des voorhofs met haeren zeylen,

20

Die cleederen der officen tot den dienste in die heylige plaetse, die heylighe cleederen des priesters Aaron, met zijnder sonen cleederen, dat si dat priesterscap gebruyken tot mijnder eeren.

21

Ende alle die menichte der kinderen van Israel wechghaende van Moyses aengesichte

22

offerde met bereyden, willende innige gedachte ^* die eerste vruchten) ⁺ den HERE tot den wercke des tabernakels des getuygenis, wat dat totten cieraet ende den heyligen cleederen van noode was,

* h. hefoffer

+ C

23

Het brochten beyde man ende wijf, wie dat gewillich van herten was, armringen, oorringen ringen gordels, ende alderley gulden iuweelen, Alle gulden vaten zijn tot ^* giften) den HERE toe ghedeylt,

* th. weefoffer, Daerom hiet weefoffer, om datment ten oosten westen ten zuyden ende noorden trock.

24

Ende wie dat gout oft goubloeme side hadde, purpur, roset root, witte side, gheyten har, roode ramsuellen ende goubloeme vellen, die brachtet, Ende wie siluer, gout, ende metael hadde, die bracht totten ^* offer) den HERE,

* h. hefoffer

25

Ende wie vueren hout bi hem vant, die bracht tot alderley werck des Godes dienst.

26

Maer die ^* gheleerde vrouwen dier gecomen waren) gauen goubloem gheel side, purpur, paerse side tweemael gheuerwet, ^* witte waet side, ende wormkens root,

* theb. wijse vrouwen van herten die sponnen met haeren handen

* th. ende die vrouwen groot van verstande sponnen geytenhaer

27

geuerwede rams vellen, yeghelick wt sinen vrien eygen wille dit geuende)

28

Die vorsten brochten Onix ende dierbaer gesteente tot den lijfrock die de schouderen bedecte, ende den borstlap der redelicheyt,

29

ende specerie, ende olie

[p. f2v]

tot den lichtuaten, ende tot salfolie, ende tot den goeden rueck werck.

30

⁺Aldus brochten die kinderen van Israel vriwillich beyde man ende wijf, tot alderley merc te maken, dat die HEERE gheboden hadde, door Moyses hant, datment maken soude.

+ D

31

Ende Moyses sprack tot den kinderen van Israel, siet die HERE heeft met namen geroepen Bezeleel Vrias sone die Hur sone was, vanden geslachte Iuda,

32

ende hi heeft hem veruult met den geest Godts, dat hi wijs, verstandich, constich is tot alderley werc,

33

constelic te arbeyden int gout, siluer ende metael edel steen te snijden ende in te setten, hout te timmeren, te maken alderley constelic werc, watmen met hameren wercken mach,

34

ende hi heeft hem onderwisinge in zijn herte gegeuen, Ende Ooliab den sone Achisamach vanden gheslachte Dan,

35

Hi heeftse beyde met wijsheyt veruult, dat si maken souden wercken des timmermans, berduerwerckers, ende bancwerck van goubloeme side, van purper, van paerse side tweemael gheuerwet, van witte side, ende dat si alle dinc weuen, ende alle nieuwe vonden vinden.

§ Hoe den Tabernakel, die gardinen, cleederen ende decselen berderen voorhancsels ende andere cleederen gemaect werden.