De Vorsterman Bijbel

§ Dat .vi. ca.

1

⁺DIe HERE sprack tot Moysen, Nv suldy sien, wat ick Pharao doen sal, Want door een stercke hant sal hijse laten, hi moetse noch door een stercke hant wt sinen lande van hem drijuen,

+ A

2

^* Ende God sprack tot Moysen, seggende, Ick ben die HERE

* § Hier begint int hebreeus dat .vi. Capit.

3

die Abraham openbaerde, Ysaac ende Iacob, tot eenen almachtigen God. Ende minen naem ^* Adonai) en heb ic hen niet condich gemaect,

* th. HEERE.

4

Ick heb een verbont met hen ghemaect, so dat ick hen geuen sal dat lant Canaan, dat lant haerder pelgrimagien, daer si vremdelingen in gheweest zijn

5

Ick heb oock ghehoort dat suchten der kinderen van Israel, die welcke die Egyptinaren met arbeyt beswaren, Ende ick heb ghedachtich gheweest mijns verbonts.

6

Daerom segt den kinderen van Israel, ⁺ ick ben die HEERE ende ick sal v wtleyden vanden ^* kercker) ^* van Egypten,) ende ick sal v verlossen van uwen eygendom, Ende ic sal v verlossen door eenen wtgherecten arm, ende in groote vonnisse,

+ B

* the. lasten.

* ten is niet int heb.

7

Ende ick sal v aen nemen tot een volck, ende ic sal

[p. d3v]

v God zijn, ende ghi luyden sult weten dat ick die HERE ben v God, die v wtgeleyt heeft vanden ^* kercker) van Egypten,

* the. last.

8

ende int lant ghebracht daer ick mijn hant ouer geheuen heb op dat ict Abraham, Ysaac, ende Iacob geuen soude, dat sal ick v geuen te besitten, Ic die HERE,

9

Moyses seydet den kinderen van Israel, Maer si en hoorden hem niet, ouermits den druck haers geests, ende den harden arbeyt.

10

Doen sprack die HEERE tot Moysen, segghende,

11

Gaet in, ende spreect tot Pharao, den Coninck van Egypten, dat hi die kinderen van Israel wt sinen lande laet,

12

Moyses antwoorde voor den HEERE, segghende, siet, die kinderen van Israel en hooren mi niet hoe soude Pharao mi dan hooren? bysonderlinghe, want ick ben onbesneden van lippen.

13

Ende die HERE sprack tot Moysen en Aaron, ende dede hen een beuel aen die kinderen van Israel, ⁺ ende Pharao den Coninck van Egypten, op dat si die kinderen van Israel wt Egypten leyden souden.

+ C

14

Dit zijn die Ouerste der huysen ^* door haer huysghesinnen.) Die sonen van Ruben des eersten gheboren soons Israels, zijn dese, Enoch, Phallu, Ezron, Carmi,

* h. haerder vaderen.

15

dat zijn die gheslachten van Ruben. Die kinderen van Simeon, zijn dese, Iamuel, Iamin, Ohad, Iachin, Zoher, ende Saul die sone des Cananeetschen wijfs, dat zijn Simeons gheslachten.

16

Dit zijn die namen der kinderen Leui, na haere gheslachten, Gerson, Kahath, Merari, Maer die daghen Leui zijn gheweest .c. ende .xxxvij. iaer.

17

Gersons kinderen zijn dese, Libeni, ende Semei, in haeren gheslachten.

18

Chaat kinderen zijn dese, Amram, Iezear, Hebron ende Vsiel, Ende die dagen des leuens Chaat zijn gheweest .c. ende .xxxiij. iaren.

19

Merari kinderen zijn dese, Mahali, ende Musi, dat zijn die gheslachten Leui, na haeren ^* huysghesinnen.)

* the. maesschappen.

20

Ende Amram nam zijns ooms dochter Iothabed ten wijue, ende si baerde hem Aaron ende Moysen, Ende die dagen des leuens Amram zijn gheweest .c. ende .xxxvij. iaer.

21

Iezears kinderen zijn dese, Chore, Napheg, ende Zechri.

22

Die kinderen van Vsiel zijn dese, Misael, Elzaphan, Sithri.

23

Aaron nam ten wijue ^* Elisebeth) die dochter AmiNadab, Naasons suster, ende die baerde hem Nadab, ⁺ Abihu, Eleazar, Ithamaer.

* th. Eliseba

+ D

24

Die kinderen Chore, zijn dese, Aser, Helkana, Abiasaph, dat zij die geslachten der Koriten.

25

Ende Eleazar Aarons sone, die nam vanden dochteren Putiel, een huys vrouwe, die baerde hem Phinees, Dat zijn die hoofden [kolom] ^* der huysghesinnen) der Leuiten geslachten.

* the. onder die vaderen.

26

Dit is die Aaron, ende die Moyses denwelcken die HEERE gheboot, dat si wtleyden souden die kinderen van Israel wt Egypten lant, met haeren heyren,

27

Si zijn oock die ghene, die totten Coninck Pharao van Egypten spraken, dat si den kinderen van Israel wt Egypten souden leyden, dit is die Moyses ende Aaron,

28

Ende in dien daghen sprack die HEERE tot Moysen in Egypten lant,

29

ende seyde, Ic ben die HERE spreect totten Coninck Pharao van Egypten, al dat ick v segghe,

30

ende Moyses antwoorde den HEERE, siet, ick ben onbesneden van lippen, hoe sal mi Pharao dan hooren?

§ Hoe Moyses roede voor Pharao in een slanghe verandert wert, ende doort slaen der roeden wort twater in bloet verandert seuen daghen lanck.