De Vorsterman Bijbel

§ Dat .xl. Capitel.

1

⁺ENde het ghebuerde daer na, dat twee dienaers die scencmeester des conincs van Egipten ende die backermeester misdeden teghen haeren heere den coninc van Egipten,

+ A

2

Ende Pharao wesende ouer hen toornich, (want die eene was ghestelt ouer die schenckers, ende die ander ouer die backers)

3

sontse inden kercker des ^* ouersten der ruytheren) daer Ioseph gheuanghen lach,

* theb. hoefmeesters huys

4

ende die ^* kerckermeester) stelde Ioseph ouer [kolom] hen, dat hi hen diende, ^* Als sommighe tijden ouerloopen waren, ende dese vast inder gheuanckenissen waren.)

* theb. hoefmeester

* the. ende saten somighe dagen

5

⁺Ende het droomde hen beyden in eender nacht, eenen yeghelijcken eenen droom, ende een yeglijcs droom had zijn bediedinghe na dat hen namaels ghebuerde,

+ B

6

Als nv des morghens Ioseph tot hen binnen quam ende sach dat si droeuich saghen,

7

vraechde hi hen, ende sprack, Waeromme is uwe ghelate droeuigher, dant pleghe te zijn?

8

Si antwoordeden, Wi hebben ghedroomt, ende en hebben niemant die ons dat wtlegghe, Ioseph sprack, En behoort dat wtlegghen niet Gode toe, vertelt toch mi, wat ghi ghesien hebt in uwen droom.

9

Doen vertelde die schencker aldereerste sinen droom, Ioseph, ende seyde tot hem, Ic sach eenen wijnstoc voor mi,

10

die hadde drie rancken, ende hi groeyde, wies, ende bloemede, ende zijn druyuen werden rijp,

11

Ende hadde Pharaos Cop in mijn handt, ende ic namse, ende dructese wt in den Cop dien ic in mijn handt hadde, ende ghaf den Cop Pharao in die handt.

12

Ioseph sprack, dat is die bediedenisse ⁺ Drie rancken, zijn drie daghen,

+ C

13

na drie daghen, sal Pharao ^* uwen dienst gedencken) ende v weder aen uwe officie stellen, op dat ghi hem weder den cop in die hant gheeft, soo ghi te voren deet,

* theb. Vwe hooft verheffen

14

Maer ghedenct mijnder, wanneer dat v wel gaet, ende doet bermherticheyt aen mi, dat ghi Pharao vermaent, dat hi mi wt desen kercker brenghe,

15

want ic ben heymelijc gestolen wt den Ebreuschen lande ende sonder scult hier in desen kercker geset.

16

Als die backer sach, dat hi den droom wiselijcken beduyt hadde, sprack hi tot Ioseph Ick sach in minen droom, dat ic droech drie coruen met mele op mijn hooft,

17

ende inden ouersten korf alderley ghebacken spyse diemen met conste der backerien maken mach, ende die voghelen aten wt den korue op mijn hooft.

18

⁺Ioseph antwoorde, ende sprac, dit is die bediedinghe, drie koruen zijn drie daghen,

+ D

19

ende na drie dagen sal Pharao uwe hooft ^* af nemen) ende v aen die galghe hanghen, ende die voghelen sullen uwe vleesch verschooren.

* the. te verheffen

20

Ende het gheschiede des derden daechs doen hielt Pharao zijnder gheboorten dach ende hi bereyde een groote maeltijt alle sinen knechten, ende onder die houeringhe, so ghedachte hi des meesters vanden schenckeren, ende des ouersten vanden backeren,

21

ende stelde den eenen weder in zijn plaetse, dat hi den

[p. c3v]

Cop Pharaoni in zijn hant gaf

22

^* Maer den anderen hinc hi aen die ghalge, ende alsoo is waer gheuonden des voorsegghers waerheit)

* the. Maer den ouersten backer liet hi hangen gelijck hen Ioseph beduyt hadde

23

Maer de scencker ^* alst hem wel ginc) verghadt Ioseph sinen bedieder.

* ten is nyet int hebr.

§ Hoe Ioseph die droomen Pharaoni wtleyt, ende ouer alle Egypten gestelt wort Vander thiende, ende hem wort geboren Manasses ende Ephraim.