De Vorsterman Bijbel

§ Dat .vij. Capittel.

1

⁺ENde die HEERE sprac tot Noë, gaet inder arcken, ghi ende alle uwe huys, Want v heb ick rechtuaerdich ghesien voor mi in deser tijt,

+ A

2

Van allen suyueren beesten neemt met v, seuen ende seuen, dat manneken ende zijn wijfken, ende vanden onsuyueren beesten, een paer, dat manneken ende zijn wijfken,

3

des ghelijck vanden vogelen des hemels, seuen ende seuen, dat manneken ende zijn wijfken, op dattet zaet leuendich blyue op alle daerde,

4

Want noch na seuen dagen sal ic laten regenen opter aerden .xl. dagen ende .xl. nachten, ende verderuen al dat wesen heeft vander aerden, dat ic gemaect heb

5

Ende Noe dedet al dat hem die HERE gheboot,

6

ende Noe was ses hondert iaren oudt, doen twater der diluuie opter aerden quam, ⁺

+ Hier hadde die werelt gestaen duisentseshondert ende sesentvijftich iaer.

7

⁺Ende hi ginc in die arcke met zijn sonen, ende zijn wijf, ende zijnre sonen wiuen om die wateren der diluuien,

+ B

8

Vanden suyueren beesten, ende vanden onsuyueren, vanden voghelen, ende van alle gewormte der aerden,

9

gingen tot hem bi paren inder arcken, manneken ende wijfken, soo hem die HEERE gheboden had, ⁺

+ Mt. xxliij. b.

10

Ende doen die seuen daghen gheleden waren, quam twater der diluuien opter aerden,

11

In den seshondersten iare des ouderdoms Noe, den seuentiensten dage des tweeden maents, dat is den dach, doen braken op alle die fonteynen des grooten afgronts, ende het deden haer op die vensteren des hemels,

12

ende daer quam een regen opter aerden, veertich daghen ende veertich nachten.

13

⁺Effen inden seluen daghe ghinc Noe inder arcken, met Sem, Cham, ende Iaphet,

+ C

[p. a4r]

sinen sonen, ende met sinen wiue, ende met zijnre sonen ^*) wiuen met hen inder Arcken,

* the. drie

14

Si ende oock alderley dier naer zijnre aert, alderley beesten naer haerder aert, alderley ghewormte, dat opter aerden cruypt naer zijnder aert, ende alderley geuogelte naer zijnder aert, Al wat vlieghen konde, ende al wat vederen hadde,

15

dat ghinc tot Noë inder Arcken, bi paren, van allen vleesche daer eenen leuendigen gheest in was,

16

Ende dat waren mannekens ende wijfkens, van alderley vleesche, ende ghinghen daer in, alsoo God hem geboden had, Ende die HEERE ^* sloot hem daer in van buyten.)

* the. sloot achter hem toe

17

Ende die diluuie quam veertich daghen lanck opter aerden, ende die wateren wiessen ende hieuen die Arcke op ^*) bouen der aerden,

* th. ende droegense

18

Alsoo nam dat water die ouerhant ende wies zeere op der aerden, Alsoo dat die Arcke op dat water dreef,

19

Ende dwater wert machtich, ende wies soo zeere opter aerden, dat alle hooge bergen onder alle den hemel bedect werden,

20

Vijftien cubitus hooch ghinck, dat water ouer die berghen, die bedect werden.

21

Doen ghinc alle vleesch onder, dat opter aerden hem roert, ⁺ van voghelen, van beesten, van dieren, ende al dat hem roert opter aerden, Ende alle menschen,

+ D

22

Ende al wat eenen leuenden adem had ^* opter aerden) dat sterf.

* the. opt droghe Sapi. x.a

23

^* Ende God dedet al te niete wat opter aerden was) vanden menschen aen totten beesten toe, soo wel tgewormte, als die vogelen des hemels, ende tverghinck al vander aerden Alleen Noë bleef daer ouer, ende ^* die met hem inder Arcken waren)

* the. Alsoo verghinck al wat opt aertrijck was

* the. wat met hem in der Arcken was

24

Ende dwater stont opter aerden hondert ende tvijftich daghen.

§ Hoe dat water ophielt, ende Noe wt die arcke ginc, ende Gode offerde ende God belouede die werelt alsoo metten watere niet meer te verderuen ende dat, zaet tijt, oost, coude, hitte, somer, ende winter, nacht, ende dach niet rusten en sullen tot des werelts eynde.