Vlissings redens lust-hof, beplant met seer schoone en bequame oeffeningen



[Folio Ii3r]
Alckmaer. Een Nieu Lied,
Op de Stem: Wilhelmus van Nassouwe. 1. ICk wil mijn gaen verheugen, En wesen wel gemoedt, Want dit en is gheen leugen Al die Gods wille doet, En sal hy niet verlaten, En noch ten geender tijt, Maer haer komen te baten, Soo ghy volstandigh zijt. 2. Dit heeftmen sien ghebeuren Al aen die jonghen Helt, Doen hy daer moste treuren Voor sijn Broers in het velt, Als sy hem woude moorden, Soo was hy seer belaen, Maer Godt hem noch verhoorden Dat sy hem lieten gaen. 3. Daer door is hy verheven Gekomen tot grooten staet, Dit is ons voor gheschreven Datmen niet nae en laet, Om hier voor alle dinghen Te leven vroom oprecht, Dan sal sijn Geest ontspringhen En blijven vast ghehecht. 4. Alsoo hy ginck betoonen Aen David jonck en schoon, Als Samuel hem ginck kroonen En hem gaf tot een loon, Hoe seer hy waer verschoven By sijn Schaepjens int gras, Geraeckte hy noch boven, Dat hy een Koningh was. Prince. Vaert wel ghy Akoleyen Al aende Zeeuse strant, Den Lauwer sal u verspreyen Al uyt het vaste Landt, Dat ghy moet jeugdigh bloeyen In Godes zeghen soet, Dan sult ghy altijdt groeyen, Gheen dingh u hinder doet. By mijn Iacob Maartsen. Fortuyn ick wout wel.