Venus minne-gifjens

[p. 24v]

[Een Man vreemt van ghedachten]

Op de Wijse: Vande Conde.

1.

EEn Man vreemt van ghedachten
Lach om te slapen cloeck,
Hem droomde dat daer vochten
Veel Vrouwen om de broeck,
Daer quam een bende stranghe
Sy waeren Grieten ghenaemt
Sy maeckten met vechten langhe
D ‘ander Vrouwen al beschaemt.

2.

De Callekens quaet van becken

Die quamen onbeswaert
Sy wilden den broeck aentrecken
Dit moet elck syn verclaert,
Maer de Grieten met cloecken moede
Wouden teghens de Callekens slaen
Sy stelden haer in orden
Met haer Vendels wijt ontdaen.

3.

Als daer den slach begoste

Niemant en track Rapier
Elck weerde hem soo hy coste
De Maykens vochten cloeck en fier,
Men sach de quade Grieten
D’ooghen branden in haer hoot,
Sy ginghen stormen en schieten
Al sonder cruyt of loot.

4.

Bettekens en Martijnkens

Die vochten altemet,
Vrsels en Francijnkens
Doen de Vroukens ontset,
Als de Grieten worden gheware
Sy schenen dul en verwoet
Sy dreven de Vrouwen te gare
Ghelijck men een cudde Schapen doet.

5.

Daer stonden noch veel Soldaten

Met haer schilt ghescheurt,
Lysbetten mee ter baten,
De Jannekens quamen onghetruert,
Soo meenighe stoute Nele
Vochten met cloecken moe
De Callekens keecken vele
Sy en dedender niet veel toe.

6.

Tannekens en Maghdalenen

Quamen de Broeck besien
De Grieten smeeten met steenen
Het schenen dulle lien,
De Sijnkens sonder vresen
Scheurden de Broeck ontween
De Grieten quamen trecken en tesen
Ghelijck twee houden aen een been.

[p. 25r]

 

7.

 

Acht Vaendels Jacomynkens

 

Quamen daer aen ghedruyst,

 

En thien Vaendels Pierynkens

 

Hebben daer in den hoop ghebuyst,

 

Veel Geertkens en Lenoren

 

Wel hondert int ghetal

 

Elck wilde de Broeck oorbooren

 

Maer de Grieten doodense al.

 

8.

 

Seven hondert Beyckens

 

Waren oock seer hooch befaemt

 

Sy quamen met haer Meykens

 

Sinte veur open ghenaemt,

 

Sy hadden haer vermeten

 

De Grieten te vallen aen boort

 

Maer de Grieten hebben haer gesmeten

 

De Beyckens riepen moort.

 

9.

 

Sy hebben de Broeck behouwen

 

De quade Grieten fel

 

t’Schynt dat sy alle Vrouwen

 

Int kyven dwinghen wel,

 

Maer ick pryse de Grieten int vechten

 

Want seven synder cloeck ghenoech

 

Teghen een Vaeudel knechten

 

Die noyt met swaerden sloech.

 

10.

 

Die dit Liedeken stelde

 

En deeds deur gheen envye,

 

Een Griete die hem quelde

 

Sy was hem seer partye,

 

Gheen argher Vrouwen die leven

 

Dan de Grieten my verstaet,

 

Sy souden den Duyvel doen beven

 

Wanneer sy spreecken quaet.

De beste Griete diemen oyt vant

Was die den Duyvel op’t kussen bant.