Veelderhande gheestelicke liedekens
(1558)–Anoniem Veelderhande gheestelicke liedekens–
Auteursrechtvrij
[pagina 376]
| |
Dat die weerelt groot wilt achten
Want tis een afgrijselickheyt
Uoor God also wy lesen
Dat hier so Christus seyt
Uoor den menschen wert gepresen
Ureest niet voor eenich leyt
Hy mach en wilt ons ghenesen
Coemt die daer dorstende zijt
En sterft niet van ghebreke
God en is tot gheender tijt
Niemant ter noot besweken
Al ist dat hy verbeyt
Uan uwen commer te stelpen
Hy is nochtans bereyt
Om v subijtelick te helpen
Dus en vreest voor gheen leyt
Noch voor der Leuwen welpen.
Uan valsche leeringhe went
Herte, sin, ende v ghedachten
Sy maken v herte verblent
Na Ieremias klachten
En gheeft geen gehoor spreect God
Den Leeraers die v leeren
Die preken haers selfs ghebot
Niet wt den mont des Heeren
Sy belouen haer het beste lot
Die mynen name blameren.
Die na haers herten lust
Wandelen haer quade ganghen
Segghen sy, v wert gheblust
Uwer pijne groot verstranghen
Want die Heere selue spreect
U en sal gheen quaet ouercomen
Dus werd ick nv begheckt
Door haer versierde dromen
Mijn woort houden sy suspect
Mijn macht die willen sy kromen
| |
[pagina 377]
| |
Keert v al tot den steen
Die in Syon is gheleghen
Want hy ende anders gheen
Heeft ons last ghedreghen
Want desen steen valliant
Is Christus na Paulus talen
Die van God is ghesant
Om te draghene ons qualen
Die dat verloren schaepken weder vant
En bracht ter hoogher salen.
Prince wilt Gods woort
Al in v herte prenten
Want der sielen confoort
Staet in des woorts adrenten
Op niemant el en wacht
Want vermaledijt ten stonden
So is hy snoot gheacht
Na des Propheten vermonden
Die inden mensche stelt zijn cracht
Die selue in boosheyt zijn gheuonden.
|
|