Veelderhande gheestelicke liedekens
(1558)–Anoniem Veelderhande gheestelicke liedekens–
Auteursrechtvrij
[pagina 336]
| |
O Heere weest doch mijns ghenadich
Want teghen strijden lijt mynen moe
In mijnder noot, weest mijns beradich
Alleen door v verwacht ick tgoet.
Ghedenct dat woort ws monts warachtich
Op dwelck dat ghy my hope gaeft
Dat was mijn troost zijt des ghedachtich
Hoe wel ghy my nv aldus straeft.
Dijn pijlen zijn in my ghesteken
U hant is op my beswaert
Metten dooden ben ick gheleken
Ghelijck die ghene de onder vaert.
Hoe langhe wilt ghy ommekeeren
Hoe langhe lijde ick tsvyants smaet
Uwen naem wilt toch gheuen eeren
Oock hebdy recht op die misdaet.
Ghy zijt doch selue die my op hief
En van den slijck op nam
Mijn salicheyt ick van v besief
En weest doch altijt niet so gram
Castijende straft ghy mijn misdaet
Mijn schoonheyt is te mael verteert
Heel ydel is al tsmenschen raet
Maer Heer v plaghe doch van my weert.
Tis al een moort in mynen beenen
Dat my mijn vyant dus bespot
Daghelicx spreeckt hy met vereenen
Daer en is gheen hulpe aen uwen God.
Mijn siele hoe muechdy aldus dolen
Ende wesen so onrustich in my
God heeft v sdaechs zijn goetheyt beuolen
Tsnachts set hy zijn ghesanck by dy.
Het was een vrouken van herten blijden
Sy badt den Heere voor al dat leeft
Noordt oft Suydt West aen allen zijden
Want hy ist alleen die voetsel gheeft.
|
|