Veelderhande gheestelicke liedekens

C Een ander.

[p. 333]

 

O God hoe ydel zijn alle menschen

 

Maer voor hem die den Heere betrout

 

Gheen meerder salicheyt en canmen wenschen

 

Dan dlicht zijns aenschijns dwelck niet en flout

 

Als ghy menschen misdaden aenschout

 

Met straffinghe wilt ghy hem kastijen

 

Wel hem die in den Heere kan verblijen.

 

 

 

Ghy hebt den sluetel des leuens en des doots ⁺

 

Ghy muecht ons alleene maken salich

 

Ghy zijt ons sterckste in den tijt des noots

 

Die op v betrouwen en zijt ghy niet falich

 

Maer v goetheyt wil ick zijn verhalich

 

U gramschap duert eenen cleynen tijt

 

U goetheyt is eewich sonder respijt.

 

 

 

Al doode my God seyt Iob al voren

 

Noch so sal ick altijts hopen in hem ⁺

 

Hy proeft het ghelooue zijnder wtuercoren

 

Door lijdsaemheyt maeckt hy de syne tem

 

Salich zijnse die stantuastighe ick seker ben

 

Ende die stantuastich blijuen tot inden ent

 

Wiens betrouwen op God den Heere is ghewent.

 

 

 

Ghy lijdsamighe weest sonder smerten

 

Betrout op God sonder afgaen

 

Want hy is by den bedrucken van herten

 

So die Psalmiste doet vermaen

 

Al laet een moeder haer kint seer saen

 

God en sal v niet laten int ghepijn ⁺

 

In den dach des drucx sult ghy gheholpen zijn.

 

 

 

Wat ghy begheert van God almachtich

 

Ghelooft ende het wort v ghegheuen

 

Hy sal veranderen v tranen klachtich

 

In blijschap dus zijt vrij van sneuen

 

Laet v herte tot God zijn verheuen

 

Loeft ende danckt den Heere in uwen gheest

+ Apoca.

+ Iob.

+ Psalm.

[p. 334]

 

En voor de menschen v niet en vreest

 

 

 

Princelick God ick arm gheuanghen

 

Tijper in banden hert ende stijf

 

Met Manasses roep ick boet mijn verlangen

 

Uergheeft o God mijn sondich bedrijf

 

In sonden van moeder ontfing ick dlijf

 

Ghenade roep ick met den Publicaen

 

Och God wilt my in staden staen.