Veelderhande gheestelicke liedekens

C Na de wijse. Se iay pour vous mon auoir dependue.

O Goddelick schijn, en mensche fijn
Op elcx termijn, sidy den medecijn
Uan v vassalen
Troost alleyn, moghen wy tot v halen
O v cruyce reyn, beurijt ghemeyn
Alle sondaren
Ons aduocaet, hooft en prelaet
Als wy zijn desolaet, ghy zijdet toeuerlaet
Wilt ons bewaren.

Messias claer, sidy voor waer
Die ons oock allegaer, verlost hebt openbaer
Uan dhelsche bruyne
Uerlosser soet, van ons allendighe pijne

[p. 317]

 

U woorden vroet, my open doet

 

Wilt ons verlichten

 

Want ghy die doot, storft pijnich bloot

 

Dit soete exploot, ons sonden groot

 

Dede alle swichten.

 

 

 

Al dhelsche cracht, en sweerelts macht

 

Onwijs bedacht, Atropus pacht

 

Hebdy onder voeten

 

Och tseerich cas, wilt aen my wat versoeten

 

So mach ick ras, die druckich was

 

In v verblijden

 

Mijn sonden vremt, bid ick v temt

 

Daer tvleesch noch inne swemt

 

Eer my dat lijf ontcremt

 

Tis noch in tijden.

 

 

 

Salich Princier, eewich rosier

 

Al mijn last buytertier, wilt slaken schier

 

Eer ick verdole

 

Helpt my valliant, wt der fortuynen schole

 

Heere playsant, biedt my die hant

 

Wilt grief beweeren

 

Niemant dan ghy, en staet my by

 

Als ick mistroostich zy, die ick betroude vry

 

Die zijn al in mijn deeren.