Veelderhande gheestelicke liedekens

C Na de wijse. In een prieel vol rieckende roosen.

MOyses seer vierich in alle zijn wesen
Is op gheresen, seer stranghe gegaen
Tot Sinay den berch ghepresen
Also wy lesen, naer sheeren vermaen
De thien gheboden heeft hy van God ontfaen
Daer stont in gheschreuen, hoe wy souden leuen
Naer Gods beuel schriftuerlick beraen.

Laet ons met sanghe nv gaen verblijden
Op alle zijden, ghy volck van Israel
Aaron die heeften desen tijden
Om ons beurijden, geblust ons groot ghequel
Hy heeft een calf ghegoten door ons beuel
Een God der Goden, elck wert nv gheboden
Te doen omayge met sanghe en met spel.

Leuende kinders niet om bedwinghen
Laet ons nv singhen, gheestich triumphant
Desen nieuwen God die wy hier bringhen
Wilt dat wy springen, met vruechden so playzant
Hy heeft ons gebrocht al wt Egypten lant

[p. 297]

 

Als wy beseffen, moeten wy verheffen

 

Ons gulden kalf als kostelicken pant.

 

 

 

Moses ons voocht is achter bleuen

 

En heeft begheuen zijn kinders al ghemeyn

 

Wie weet bescheet of hy mach leuen

 

Hy laet ons leuen al sonder capiteyn

 

Dies wy een dierbaer beelde van goude reyn

 

Seer exalteren, als God adoreren

 

Bouen alle Goden al in des weerelts pleyn.

 

 

 

Dit Princelick kalf moet ons behaghen

 

Dat wy hier draghen op onsen pylaer

 

Om dat wy Moses niet en saghen

 

In veertich daghen het viel ons veel te swaer

 

Dus willent wy gaen setten op eenen outaer

 

Dat elck met brande sal doen zijn offerhande

 

Dit gulden kalf met schoonen lichte klaer.

 

 

 

God is een kender van allen saken

 

Met snelder spraken vraechde hy Moses bloot

 

Laet my v volck brenghen ter wraken

 

Ick sal v maken, een Regeerder groot

 

Een kalf hebben sy ghegoten van goude root

 

My ter oneeren, ghy moet haest afkeeren

 

Tis een misdaet bouen alle sonden snoot.

 

 

 

God scheen doen gram in dit verklaren

 

Doen ghinck hem baren Moses metter spoet

 

Heere ghy moet mijn volck noch sparen

 

Sonder beswaren, tempert uwen moet

 

Sy sullen my beschamen ist dat ghijt doet

 

Ist so gheschepen, willet my wt strepen

 

Wt den boeck des leuen duncket v goet.

 

 

 

Als Moses langhe hadde ghebeden

 

God was te vreden, Moses doen vertrack

 

Comende daer den berch beneden

 

Die quade seden hem ter herten stack

 

Om dat sy tkalf aenbeden den beestelicken sack

 

Trefuys van beelden, sy dansten sy speelden

 

Hy werp zijn steenen tafel datse brack.

[p. 298]

 

Moses seer grammich van dien dangiere

 

Dat kalf seer diere, werp hy in den brant

 

Hy stroeyde tpuluer menighertiere

 

In de reuiere, lancx henen den kant

 

Elck moest puluer drincken na zijn verstant

 

Dranck van ellenden, met grooter amenden

 

Om dat hyse tkalf aenbedende vant.

 

 

 

Prince van Leui wt dien gheslachte

 

Seer groot van machte, die Gods kinders zijt

 

Ghy sloecht doen met voorsinnich ghedachte

 

Door Moses klachte, naer Bibels belijt

 

Dryentwintich duysent bleuer daer subijt

 

Twert al versleghen, dat Leui quam teghen,

 

Dit gulden kalf was cause van den strijt.