Veelderhande gheestelicke liedekens
(1558)–Anoniem Veelderhande gheestelicke liedekens–
Auteursrechtvrij
[pagina 295]
| |
En houdt ick niet een achter noch voren
Maer Uader slaect toch uwen thoren
Mijn crancheyt aensiet
Ick en twijfel niet
Ick sal noch eewich met v vruecht oorboren.
Beuechtinghe ende aenstoot
Moet ick lijden van daghen tot daghen
Uiant, weerelt, helle, sonde en doot
Legghen na my listen en laghen
Maer Uader in v hebbe ick behaghen
Gheeft my de macht
Dach ende nacht
Dat ick v cruys mach helpen draghen
Int Babylonsche lant
Hout my die doot ende die sonde gheuanghen
Maer Heere ghy hebt den bant
Ontdaen met uwer hant niet om verstrangen
Dies ic wt rechter liefden v moet aenhangen
Die weerelt loos
Is wt altoos
Om my te brenghen in haer bedwanghen.
Sondich ende cranck
Is mijn nature ghecomplexioneert
In sviants bedwanck
Was ick door Adams val ghemessuseeert
Maer Uader ghy hebbet al gherefereert
Adams misdaet
En Euaens raet
Hebdy voor uwen Uader ghepayseert.
U bermherticheyt ydoon
Begheer ick Heer maer niet v recht
Hadde ick na mijnen loon
So waer ick een arm verwaten knecht
Uan trijcke so ons de Schriftuere secht
Ghy zijt alleyn
Die ons maect reyn
Uan al ons sonden suyuer en oprecht.
| |
[pagina 296]
| |
Lof eer en prijs
Moet v toevloeyen God van Israel
Dats mijn aduijs
Want ghy ons hebt gebrocht wt groot gequel
Dus ick v wil aenbeden en niemant el
Want door v cracht
Hebdy die macht
Babylon ghenomen met haren raet seer fel.
Prince van Iuda
Alle leden moeten voor v beuen
En roepen aen v ghena
So ons die Propheten te kennen gheuen
Salicheyt wt v moet elck aencleuen
O dierbaer pant
Seer triumphant
Ghy zijt die wech waerheyt en tleuen.
|
|