Veelderhande gheestelicke liedekens

C Na de wijse. Ueriubileert.

MIinen gheest die heeft altoos verlangen
Om van dit vlees verlost te zijn
Want my die sonde neemt gheuanghen
Dies lijdt mijn herte een groote pijn

En hoe dat ick altoos moet strijen
Dat weten sy wel diet hebben gheproeft
Ick worde bestormt van alle zijen
Waer door ick dick ben seer bedroeft.

Ick heb wel dick eenen goeden wille
Maer het voldoen en vinde ick niet
Daerom moet ick hier af swijghen stille
Want van my seluen en mach ick niet.

Maer als ick dan Gods goetheyt aenschouwe
So wort mijnen gheest wederom verwect
Dat ick zijn woort vast betrouwe
Hoe seere my tquaet oock daer af trect.

Sijn woort en sal ick nemmermeer laten
Want het gheeft my so stercken moet
Dat ick met recht tvleesch moet haten
Al vallet alle sinnen hart en onsoet

Mocht my Gods goetheyt altijt geburen
So leefde ick vry sonder verdriet
Uerblijden sou ick tot allen vren
Want sonder hem en can ick niet.

Maer die dit liedeken eerstmael stelden
Sy conuerteerden in haren sin
En veel vianden haer daghelicx quelden
En God seynt haer altoos zijn gratie in.