Veelderhande gheestelicke liedekens(1558)–Anoniem Veelderhande gheestelicke liedekens– Auteursrechtvrij Vorige Volgende C Na die wijse. Uous perdes tamps. IN desen tijt, Christen broeders bequame Elck gheest subijt, wilt gheen gelooue geuen Maer wie ghy zijt, proeft de geesten al tsamen Of zijs in den strijt, van God blijcken beseuen Want daer zijn ongemeten, veel valsce Propheten als opgeblasen geesten, werckers boos vol tempeesten Die hem beromt, wacht v daer af al voren Antichrist coemt, hy is van nv gheboren. Den gheest segt claer, dat ten lesten termine Sommige voor waer, tgelooue sullen wijcken Uolghende naer, sduyuels valsche doctrijne Uol luegens swaer, een geueynsde practijcke Hebbende seer behendich, een brantteecken inwendich. Bloetghierich vol onrusten, minnende de wellusten, Die doort bedwanck sullen naer claer bedieden, Spijse ende dranck ende thouwelick verbieden. Siet naer partie, v niet latende bedrieghen Door Philosophie, of menschelijcke instellen Die compaingnie hoortmen moetwillich liegen Is vol enuie, tvolck sy lastelick quellen Dus laet v niet verwinnen, van vleeschelijcke sinnen Die segghen sonder mincken, wilt dat eten oft drincken Hebben een schijn, der wijsheyt sy in noden Dwelck niet en zijn dan der mensche geboden. U lieden wacht van geueynsde ypocrijten Den mont die lacht therte is ter wraken vierich [pagina 249] [p. 249] Wel daer op acht, sy gaen in schaeps habijten Maer tzijn dach en nacht grijpende woluen ghierich Die tvolck lasten doen voeren, en selue niet en roeren Eere die sy soecken, tvoorsitten tallen hoecken Buyten verciert, sy en zijn niet om vereenen Binnen logiert, niet el dan doode beenen. Wacht voor tgebroet, van alle lucifers cnapen Schijnende verwoet, als geslachte der slangen Suyghende dbloet, van die onnoosel schapen En de wolle goet, sy voor habijt aenhanghen Hebbende een schijn loyalich, van een leuen Godsalich Gods cracht sy versaken, en sgheests keest niet en smaken Uan sulcken v went, sy zijn vol ydel cluchten Al siende blent, bekent aen haerlier vruchten. Die selue zijnt, die de huysen doorloopen Ende ghepijnt, vroukens gheuanghen leyden Het blijct soot schijnt, donnoosel moet becoopen Want ghefenijnt, sy haer netten spreyden Sy leeren bouen sommen, en nemmermeer en commen Tot kennissen der waerheyt, doende verloren arbeyt Maer ghelijck sy, die Moyses wederstonden Die waerheyt vry, wederstaen dese valsche vonden. Tzijn menschen al, van sinnekens gebroken Door des vleeschs val, int ghelooue versteken Dit is tghetal, van wien dat is voorsproken Tvoleynden sal, aen henlieden ghebreken Want haer dwaesheyt gheresen, sal elck openbaer wesen Dus wilt van henlieden wenden, want tzijn leyders der blenden Christus is den steen, wilt daer op vast fonderen In anders gheen, is der sielen salueren. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij