Veelderhande gheestelicke liedekens

C Na de wijse Alst al rust mans en vrouwen.

ICk roep wt swaer benouwen
Mijns gheests sonder vermijen
Tot v o God vol trouwen
Dat ghy ons wilt beurijen
Uan alle die ons benijen
Bewaert ons tot elcken keere
Laet ons met v verblijen
U goetheyt wilt vermeeren
O ghenadighe Heere.

En laet my niet te schanden
Comen om mijn misdaden
En wilt dwerck uwer handen
O Heere niet versmaden
Uerlost ons vanden quaden
Door v ghenade pure
Ontfanct doch in ghenaden
U selfs creature
In elcker vre.

Ick hebbe buyter maten
Ghedwaelt tot allen stonden
Sheeren wech heb ick verlaten
Gheuallen ben ick in sonden
Mijn misdaet is quaet om gronden
Die ick dickmael heb bedreuen
Twaer schande om vermonden
Ons boose sondich leuen
Heere willet vergheuen.

[p. 225]

 

O God wilt niet ghedencken

 

Ons misdaet daer wy in wesen

 

Wilt ons v gracie schencken

 

Door v goetheyt ghepresen

 

Oft anders so wy lesen

 

Sullen wy gantsch bederuen

 

Wilt ghy ons niet ghenesen

 

So moeten wy verweruen

 

Een eewich steruen.

 

 

 

Wie sal staende blijuen

 

Al voor Gods aenschijn reene

 

En hy ons wilt toe schrijuen

 

Ons misdaden groot oft cleene

 

Uoorwaer daer en is niet eene

 

Sy en zijn al vol ghebreken

 

Ia sondich al ghemeene

 

En van der waerheyt gheweken

 

Na Dauids spreken.

 

 

 

God sach van shemels throone

 

In al des weerelts hoecken

 

Offer yemant in persoone

 

Was, die God wilde soecken

 

Men sietse nv vercloecken

 

Tot sonden is elck gheneghen

 

Sy zijn in duyster broecken

 

Ghedwaelt al van den weghen

 

Int quaet ter deghen.

 

 

 

Prince God der heyrscharen

 

Wiens macht blijft sonder enden

 

U schepsel wilt nv sparen

 

Dwelck verdient heeft swaer amenden

 

Wilt v tot ons waert wenden

 

Ons boosheyt en wilt niet mercken

 

Maer wilt ons uwen gheest senden

 

Op dat hy ons mach stercken

 

Tot goede wercken.