Veelderhande gheestelicke liedekens

[p. 220]

C Een ander.

HOort al te samen int ghemeene
Ionck en oudt, arm en rijck
Die in benautheyt en in weene
Light gheuallen van den dijck
Wilt niet verslaghen, laet staen v claghen
Ghy sult noch rijsen alle ghelijck.

Al is beroyt den ambachts man
En den huysbuyck int verdriet
Der fortuynen radt wel drayen can
Wilt daerom verslaghen niet
Wt onsen ghetrure, in corter vre
Sullen wy noch comen siet.

Pouer die is wt ghelaten
Gheluyt der armoeden verre men hoort
Uerdriet en benautheyt in allen straten
Maken tvolck alomme verstoort
Maer wilt niet wanhopen, Gods gracie staet open
Bidt den Heere al om confoort.

Den arbeyt die claecht nv seere
Ouer het ghelt zijn liefste soet
Maer int ghebruycken tzijnder oneere
Onnuttelick hijt verdoet
Ons eyghen sonden, zijn die ons wonden
Diet te rechte wel beuroet

Ghewelt ende hooueerdie
Brootdroncken weelde zijn bekent
Ouerdaet aen elcke sie
Regieren den tijt present
Dies men hoort suchten, in alle ghehuchten
Ouer des wreeden tijts torment.

Practijcke ende woecker tsamen
Domineren met dat ghelt
Al soudt arbeyt bat betamen
Sy houwense al met ghewelt
Hy moet gedooghen, met weenenden ooghen

[p. 221]

 

Door den tijt wort hy ghequelt.

 

 

 

Den toecomenden tijt met druck en pijne

 

Dreycht ons met benautheyt fel

 

Onser quaetheyts discipline

 

Dies wy moghen suchten wel

 

Die leste iaren, hem openbaren

 

En wilt niet gheloouen el.

 

 

 

Prince alle minste en meeste

 

Nemet in dancke wie ghy zijt

 

Uan ons liefhebbers ionck van gheeste

 

Laet doch varen alle verwijt

 

Wilt schouwen queste, wy doen ons beste

 

Ons factie is na den tijt.