Veelderhande gheestelicke liedekens
(1558)–Anoniem Veelderhande gheestelicke liedekens–
AuteursrechtvrijC Na de wijse. O radt van auontueren.
HOort hoe Christus na Galileen
Track wt dat Iootsche lant
Om dat hem die Pharizeen
Benijden in elcken cant
Door Samarien moest hy wesen
Daer hy by een fonteyne quam Ga naar margenoot+
| |
[pagina 218]
| |
Die Iacob also wy lesen
Gaf Ioseph synen soon ghepresen
Daer Iesus zijn ruste nam.
Sijn discipelen ghetrouwe
Ghinghen spijse coopen al tot Sichaer
Een Samaritaensche vrouwe
Quam om water te putten daer
Want Iesus bleef daer alleene
Ende hy sprack dat vrouken toe
Gheeft my wt ionsten reene
Een droncxkens waters cleene
Want hy was van gaen so moe.
Hoe begheert ghy van my dus Heere
Te drincken sprack tvrouken gent
Want die Ioden in gheenen keere
Samaritanen comen ontrent
O vrouken sprack Christus verheuen
Kende ghy Gods ghiften soet
Ghy soudt hem om drincken aencleuen
Ende hy soude v water gheuen
Dwelck eewelick leuen doet.
Wat water mach dit wesen
Sprack het vrouken goedertier
Sijt ghy bouen Iacob ghepresen
Want hy haelde zijn water hier
Christus sprack, hem sal noch dorsten
Die van dit water drinct
Maer in wien mijn water mach rusten
Hem en sal nemmermeer drincken lusten
Twelck int eewich leuen sprinct.
Wilt my van dat water schencken
Sprack tvrouken tot Christum dan
Christus sprack wilt v bedencken
Ende roept my uwen man
Tvrouken sprack na Ioannes beschrijuen
Gheenen man en heb ick so ghy siet
Christus sprack om duecht te verstijuen
| |
[pagina 219]
| |
Ghy hebter ghehadt tot vijuen
Ende die ghy nv hebt en is v niet.
Heere ghy zijt een Prophete
Sprack tvrouken hoort dit vermaen
Ghy seght my wat ick int secrete
Binnen mijnen leuen hebbe misdaen
Waer moetmen God aenbeden
Op den berch te Ierusalem fijn
Seght my Heere vol wijsheden
Want hier die Ioden vol onureden
Om die Samaritanen zijn.
Ghy en weet niet sprack die Heere
Wien ghy aenbidt oft vreest
So wie God bidden wil tot zijnder eere
Moet hem bidden inden gheest
Doen sprack die vrouwe vol vramen
Ick ghelooue dat ghy Messias zijt
Met dien zijn discipelen quamen
Meester eet seyden sy al te samen
Maer Christus hadde anderen appetijt.
Het vrouken is sonder sparen
Ras na die stadt Sichar ghegaen
Sy liep al om te openbaren
Ende haer cruycke liet sy staen
Wat haer gheschiet was ginck sy ontcnoopen
Als tvolck dit hadde ghehoort
Quamen sy met grooten hoopen
Neerstich wt die stede gheloopen
En gheloofden aen Christus woort.
Ghy Christenen in alle hoecken
Betrout aen Christus woorden naect
Wilt in hem v salicheyt soecken
Dats die spijse daer hy na haect
Den oogst is nv voor ooghen, de vruchten staen al wit
Wilt Christo liefde tooghen
En uwen naesten te helpen pooghen
So dat ghy zijn eewich rijck besidt.
|
|