Veelderhande gheestelicke liedekens(1558)–Anoniem Veelderhande gheestelicke liedekens– Auteursrechtvrij Vorige Volgende C Een ander. HOort ghy alle in desen tijt Ghy mannen ende vrouwen Laet ons gaen met groot iolijt Handen ende knien vouwen Ghelijckelick tot God, ende houwen zijn gebot So worden wy nieu herboren Al inden gheest, die niet en vreest Want Christus heeft ons wtuercoren. Schamen moghen wy ons wel Die hier in sonden slapen Ende zijn God dus rebel Die ons heeft gheschapen Ende dienen God Bel, die ons brengt int gequel Gods woort gaen wy versmoren Och soect doch baet, eert valt te laet Want Christus heeft ons wtuercoren. Laet ons suchten voor ons misdaet Wilt God v herte schencken Keert dan met berou van quaet Gheen sonden en wil God ghedencken Is dat met soet accoort, dat God spreect sulck woort Het is siet al te voren Coemt spreect hy sone excellent, hy is onsen loon present Want Christus heeft ons wtuercoren Al ons leuen is eenen strijt Spreect Iob op deser eerden Wy en hebben gheen respijt [pagina 216] [p. 216] Die doot coemt ons aenueerden Dan coemt dat oordeel snel, dat brengt ons in de hel Dan ist doch al verloren Och soect doch baet, eert wort te laet Want Christus heeft ons wtuercoren. Prince maect v van herten reyn En wilt toch leuen na den gheest Houdt in eeren Gods woort alleyn So langhe ghy zijt in dit foreest Stelt v hope alleen op God, hebt lief die met v spot Wilt alle ghenoechte verstoren Doetmen v aen last, staet vry vast Want Christus heeft ons wtuercoren. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij