Veelderhande gheestelicke liedekens(1558)–Anoniem Veelderhande gheestelicke liedekens– Auteursrechtvrij Vorige Volgende Een ander. HOort al tsamen die met Christum wil leuen Hoe dat Christus ghebenedijt Om ons te verlossen so daer staet gheschreuen Is ghegaen in eenen bitteren strijt Also ons de Schriftuere belijt Iudas waren dertich penninghen ghegheuen Dat hy Iesum soude leueren des seker zijt. De discipelen seyden tot Christo, laet ons weten Waer dat ghy wilt dat wy sullen gaen Het Paeschlam bereyden op dat ghijt moecht eten Om dat al te samen soude zijn voldaen Twee discipelen hoort mijn vermaen Ghinghen in de stadt dat Paeschlam bereyden Also sy van Christo hadden verstaen. Tsauonts als sy waren aen die tafel gheseten [pagina 210] [p. 210] So dede Christus daer een vermaen Uoorwaer segh ick v ende laet v weten Een van v allen sal my verraen Een yeghelick was met druck beuaen Elck seyde ben ickt Heere latet ons weten Ende waren seere daer in belaen. Iesus antwoorde wilt my hooren spreken Hy is hier mede int ghetal Die met my zijn hant inde schotel sal steken Die ist die my verraden sal Ghelijck van hem gheschreuen is een voor al Maer wee hem die coemt in sulck gebreken Die de sone des menschen leueren sal. Ben ict niet meester heeft Iudas gesproken Christus sprack, ghy hebbet gheseyt Iesus nam dat broot en heuet ghebroken Dat hy zijn discipelen bereyt Neemt, eet, dit is mijn lichaem voor v ghespreyt Ende hy nam den kelck danckende, schoon ontloken Des nieuwen testaments in mijnen bloede bereyt. Christus ginck na den berch van Oliueten Om dat altesamen soude zijn volbracht Hy sprack tot zijn Apostelen int secreten Ghy sult my al versaken in dese nacht Peeter sprack een woort seer groot Al waert dat sy v altemael verlieten So sal ick by v blijuen tot in mijn doot. Iesus sprac, voorwaer wilt dit wel smaken Ten is niet in dijn eyghen cracht Uoorwaer seg ic v, ghy sult my noch versaken Eer den haen craeyt drymael in deser nacht Sijn discipelen heeft hy met hem ghebracht Seggende wilt nv een weynich met my waken De vre coemt daer ick na hebbe ghewacht. [pagina 211] [p. 211] Inden berch van Oliueten is Christus getreden Uan anxte sweette hy water en bloet Daer heeft hy synen hemelschen vader aengebeden Ghestrect op deerde met grooter oodtmoet Abba mijn hemelsche Uader goet Uan my neemt desen kelck van bitterheden Maer vader uwen wille hier met my doet. Dit was de vre die Christus soude naken Sijn Apostelen die hy slapende vant Moecht ghy niet een vre met my waken Den geest is gewillich, maer tvlees is cranck Slaept ende rust nv vry en vranck Het is ghenoech, de vre is ghecomen Dat ick sal gheleuert worden eer yet lanck. Aldus is Christus inden strijt ghecomen De persse heeft hy alleen ghetreden Ende heeft al der werelt sonden op hem genomen Ende synen vader ghestelt te vreden Door zijn bitter doot die hy heeft gheleden Laet ons op hem betrouwen het sal ons vromen En betoogen dat wy zijn een van Christus leden. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij