Veelderhande gheestelicke liedekens
(1558)–Anoniem Veelderhande gheestelicke liedekens–
Auteursrechtvrij
[pagina 193]
| |
HEt sweert is wter scheyden
Om te storten donnoosel bloet
Die Pharizeen verleyden
Pilatum al metter spoet
Al is Pharao op ons verwoet
God can ons wel ghenesen
Uoor den onwetenden ist dat ick bidden moet
Al die mijn veruolghers wesen.
Alleen zijn sy verbolghen
Om dat ick op Christum wil staen
Ende willen my veruolghen
Ick en weet waer henen gaen
Al soudense my mijn hooft af slaen
Die Schriftuere sal ick noch lesen
O Heere wilt haer ten besten beraen
Al die mijn veruolghers wesen.
Als ick sadt in die taueerne
Daermen niet dan boosheyt en brout
Doen saghen sy my seer gheerne
Wijf en kint liet ick benout
Dit hebben sy langhe wel aenschout
Sy en straften my noyt van desen
O Heere v gracie op haerlieden dout
Al die mijn veruolghers wesen.
Egypten moet ick verlaten
Sy hebben mijns leuens beroemt
Gaen dolen mijnder straten
En verbeyden den dach die coemt
Wie Christum volghen wilt onbeschroemt
Wort van der werelt begresen
O Heere en laetse doch niet verdoemt
Al die mijn veruolghers wesen.
Al ist dat sy begheeren
Mijn bloet seer onueruaert
Wie sal my moghen deeren
Als ghy my o Heere bewaert
U heylich woort heb ick verclaert
| |
[pagina 194]
| |
Dwelck sy my verbieden te lesen
O Heere en laetse doch niet beswaert
Al die mijn veruolghers wesen.
Doen ick ouerspel hanteerde
En leefde na des duyuels raet
Int hoeren huys verkeerde
Daermen alle duechden versmaet
Doen ick loonde quaet met quaet
Die werelt heeft my ghepresen
O Heere vergheeft haerlieder misdaet
Al die mijn veruolghers wesen
Doen ick Schriftuere ghinck versinnen
O mijn Heere ghebenedijt
Wy moeten die werelt verwinnen
Souden wy comen daer ghy zijt
Ick wil gaen laten des werelts iolijt
Al sou ick zijn verknesen
O Heere schelt haerlieder boosheyt quijt
Al die mijn veruolghers wesen.
Syon wilt vromelick strijden
Ga naar margenoot+ Blijft volstandich tot in den ent
Ga naar margenoot+ Uwen Hertooch heeft moeten lijden
Ga naar margenoot+ Totter doot was hy in torment
Ga naar margenoot+ Dat deden die Schriftgheleerden blent
Die de waerheyt hebben verwesen
O Heere bewaerse doch ongheschent
Al die mijn veruolghers wesen.
Prince God wilt ons verstercken
Door v goetheyt o Heere ient
En na v behaghen in ons wercken
So dat wy vreesen gheen torment
Al sou het lichaem worden gheschent
Als v licht in ons is gheresen
O Heere maect haer uwen wille bekent
Al die mijn veruolghers wesen.
|
|