Veelderhande gheestelicke liedekens

C Na de wijse: Ick was een clercxken ick ghinck ter scholen

HOe suyuer is der liefden gheslachte
Die liefde Gods is excellent
Die wijsheyt woont in haer ghedachte
Metten gheloouighen is sy bekent

Hebt lief den Heere wt al v crachten
Soeckt uwen broeder v seluen niet
Uan eyghen liefde leert v wel wachten
Want door die selue quam alt verdriet.

Ansiet die liefde daer Christus mede
Uan bouen hier is neder ghedaelt
Eyghen minne en greep daer gheen stede
Maer broederlicke liefde heeft hem bestraelt.

Dit was een liefde van reynder nacie
Door haer so zijn wy al verhuecht
Hoe suyuer is haer generacie
Den gheest des leuens is haer vruecht.

Deser liefden zijt altijt ghedachtich
Siet nv dat al door liefde geschiet
Want al haddy schijnsel van duechden crachtich
Hebdy gheen liefde so ist al niet.

Niet om gronderen en zijn Gods wercken
Die hy door liefde heeft ghedaen
O Heere wilt ons ghelooue stercken
So moeghen wy die rechte liefde verstaen.

Maer die dit liedeken eerstmael dichte
Door liefde was sy daer toe ghesint
Die Heere wil haer den gheest verlichten
Een vrolick liedeken druck verwint.