Veelderhande gheestelicke liedekens

[p. 180]

C Na de wijse. Tfortuynen wiel maect my veel sorghen.

HOort menschen die hier in dit leuen
Soeckende zijt ruste en ghemack
Wat sekerheyt is v ghegheuen
Dat ghy hier blijft ligghen in sonden vrack
Onder shemels dack
Sijt ghy leu en zwack
Om maer te volghen Gods gheboden fijn
Hoe mogen de menschen in sulcken dolen zijn.

Hebdy niet gehoort wat ons Paulus toont
Tottten Romeynen vindijt claer
Die vleeschelick leeft die wert gheloont
Metter doot, dats openbaer
Want wie hier nv naer
Den vleesche eenpaer
Leuen, alsmen inde Schriftuere siet
De sulcke en sullen Gods rijcke beeruen niet.

Dus wilt die wercken des vlees verlaten
Die openbaer zijn, en bekent
Als ouerspel, wilt ditte vaten
En dronckendrincken v daer af went
Haet en nijt seer blent
En Afgoden vrent
Moetty verlaten, oft ghy sult steruen
En trijcke des hemels nemmermeer verweruen.

Maer zijt als knechten die daer wachten
Op haren Heere tallen stonden
Op als hy coemt in wat tijen der nachten
Dat ghy dan wakende zijt gheuonden
So naert vermonden
Der Schrifts oorconden
Suldy beurijt zijn van swaer verseeren
Dus weest nuchter, en wacht die toecoemste des Heeren

Ist dat wy beghinnen te dincken
Die Heere vertoeft nv ten tijden

[p. 181]

 

En gaen metten dronckaerts sitten drincken

 

Die in haer snootheyt verblijden

 

Wy moeten mijen

 

Sulcke quadijen

 

Oft als God coemt en vint ons in sulc sneuen

 

So sal hy ons deel metten Godloosen geuen.

 

 

 

Lieue broeders en wilt so niet dwalen

 

Dat ghy v van God laet leyden

 

Wie naden vleesche sonder falen

 

Leuen, die zijn van God ghescheyden

 

Maer wilt bereyden

 

U herte cleyden

 

Met saechtmoedicheyt naer Christum soet

 

Die voor ons ghestort heeft zijn roode bloet

 

 

 

Prince God wilt ons ontfermen

 

Want ghy zijt ons medecijnen

 

Wilt ons met uwen gheest verwermen

 

Want sonder v Heere wy verdwijnen

 

In grooter pijnen

 

Midts duyuels lijnen

 

Sijn wy ghebonden door ons misdaden

 

Dus bidden wy Heere wilt ons ontladen.