Veelderhande gheestelicke liedekens

Een ander.

GHesellekens vander rapen bloemen
Laet ons bedrijuen vruecht en spel
Gods gheest die sal noch by ons comen
Hy coemt by ons, want hy is snel
Hy en macht niet laten dat weet ick wel
Hy siet alomme in zijn termijn
Dat scheyden van Gods wtuercoren
Tscheyden van dien dats deewighe pijn.

Ghelijck een bloemken seer wijt ontploken
So moet ons herte nv gheschien
Quaey fantasien laet zijn ghebroken
En wilt v inden gheest verblien
En wilt Gods liefde wel ouersien
En schout verkeerde sinnen als fenijn
Dat scheyden van Gods wtuercoren
Tscheyden van dien dats deewighe pijn.

Gods woort dat wort nv gansch verheuen
Ghelijck een bloem in haer bloeyen staet
In Gods woort so hanght der sielen leuen
Tis ons soeter dan honich graet
Cracht des vleeschs dit wel vaet
Het licht v schoonder dan een robijn
Dat scheyden van Gods wtuercoren
Tscheyden van dien dats deewighe pijn.

Prince mijn Heeren en wilt niet trueren
Al gheuoeldy in v den grooten strijt
Groote gracie sal v ghebueren
Al hebbens alle duyuels nijt
Ghy wort van alle sonden quijt

[p. 136]

 

Ende Godt sal ons schencken der vruechden wijn

 

Dat scheyden van Gods wtuercoren

 

Tscheyden van dien dats deewighe pijn.