Veelderhande gheestelicke liedekens

[p. 129]

Een ander.

GOds edel kinder die hier soect te behagen
In al v leuen uwen vader goet
Hoort zijn geboden die hy wil sonder clagen
Uan v ghedaen hebben wt liefden soet
Sonder taenmercken verdriet oft voorspoet
Door dese brengt hy v tot v selfs mishaghen
En tot zijn ghenaden loopen doet.

Teerste is, v Heere uwen God is een alleene
Gheen ander goden en sullen voor hem staen
Hem suldy aenbeden dienen ende anders gheene ⁺
En alle goet van zijnder hant ontfaen
Want alle hulpe en troost moet wt hem gaen
In al ons twijfelen moeten wij al ghemeene
Tot hem om raet loopen en ander versmaen.

Tweede is Gods name sult ghy met grooter eeren
In uwen mont nemen al sonder spot
In geene sake ydelick sult ghy v daertoe keeren
Noch om vergancklick goet sweeren by Godt
Al dat ghy doet sal zijn na Gods ghebodt
Om synen edelen name alleene te vermeeren
Niemant el prijs gheuen voor een lof.

Tderde is wilt dencken dat ghy sult heylich maken
Den Sabbaot of den dach des rusten soet
Uan v selfs wercken rustende in al v saken
Gods edel wercken doende metter spoet
Met vasten betrouwen op twerck dat God doet
Siende om tot v selfs verloogenen te geraken
Iesum met v cruyce volghende in ootmoet.

Tvierde is eert vader ende moeder eersame
En weest die hulpsamich daer ghy moecht
Al zijn sy stranghe tot v ende onbequame
Weest haer nochtans gehoorsaem in die duecht
Om Gods wille al verdraghet met vruecht
Want dit begheert God van v tot uwer vrame
Daer voor belooft hy v des leuens iuecht.

+ Exodi.

[p. 130]

 

Tvijfste is met wercken noch met den wille ooc

 

Wt nijt of gramschap en slaet niemandt doot mede

 

Hebt met uwen naesten altijt pays en vrede

 

Helpt vrient ende viant heeft hy schade of noot

 

Want Iesus selue is die so gheboot

 

Aent cruyce ghestoruen om onse salicheden

 

Die zijn vianden waren door sonden groot.

 

 

 

Tseste is v naesten goet en suldy niet stelen

 

Noch met bedroch ontrecken wter hant

 

Tsy in vercoopen oft coopen ofte spelen

 

Oft int onthouden eenich loon oft pant

 

Noch af winnen met listen huys of lant

 

Maer hem te helpen en laet v niet veruelen

 

Sonder taensien of tsy vrient oft vyant.

 

 

 

Tseuenste is gheen ouerspel en suldy hantieren

 

Noch in oncuysheyt leuen metter daet

 

Maer al v leuen als een Gods kint regieren

 

Reyn ende cuysch beleyden uwen staet

 

In woorden in wercken volgende Gods raet

 

Sonder yet tegen Gods woorden te versieren

 

Want daer wt compt die menschen alle quaet.

 

 

 

Tachste is en wilt gheen vals getuyge geuen

 

Twelck uwen naesten brengt in swaer verdriet

 

Maer zijt waerachtich oprecht in al v leuen

 

Gheen lueghen spreken wat v gheschiet

 

Maer na v herte gheeft des woorts bediet

 

So suldy God uwen Uader sonder sneuen

 

Als een goet kint na volghen diet v hiet

 

 

 

Tnegenste is, v herte en sal oock niet begeeren

 

Om te misbruycken een ander mans wijf

 

Maer om haer eere suldy lieuer verteeren

 

Mostet so ghebueren v goet en lijf

 

Want Christus selue seyt dit woort seer stijf

 

Toncuys aensien der vrouwen brengt sulc deeren

 

Dat voor Godt ouerspel maect sulcken bedrijf

 

 

 

Tienste is, na gheen goet en suldy ooc verlangen

[p. 131]

 

Dwelck uwen euen mensche toebehoort

 

Noch metter herten begericheyt beuanghen

 

Daer uwen naesten om soude zijn verstoort

 

Want dit is natuere en oock Gods edel woort

 

Dat elck een ander sal doen sonder verstrangen

 

Dwelc hy wil dat hem sal ghedaen zijn voort.

 

 

 

Daer om o menschen bidt Godt om zijn genade

 

Want van v seluen hebdy cleyne macht

 

Om te volbrengen al dit na Gods gheest rade

 

God moet v helpen door zijns selfs cracht

 

Door v gelooue in Godt dwelck hem verwacht

 

Als dit ghebuert is dat ghy vroech en spade

 

In hem betrout, en zijn woort niet en veracht.