Veelderhande gheestelicke liedekens(1558)–Anoniem Veelderhande gheestelicke liedekens– Auteursrechtvrij Vorige Volgende C Na de wijse. In tsmeys beghinnen met blijden sinnen. BEwaert my Heere Tot elcken keere In uwer liefden tot alder stont Wilt toch vermeeren, v weghen leeren Ons die met sonden zijn doorwont Maect my Heere door v goetheyt ghesont. Want ick vol sonden Nv ben ghebonden Mijn moeder heeft my daer in ghebaert Tot allen stonden, hoort mijn vermonden Ben ick metter broosscher natueren beswaert En hebbe deen quaet op dander vergaert. [pagina 60] [p. 60] Want wy ons leuen Hebben ghegheuen Tot sonden en ouertredinghe swaer Heere verheuen, wilt nv vergheuen Ons misdaden bermhertighe vaer Maect nv v goetheyt aen ons openbaer. Wy zijn verladen Met ons misdaden En dinct doch Heere ons boosheyt niet Want wy vol quaden, dus om ghenaden Bidden wy Heere ons doch aensiet En ghedenct doch niet, watter is gheschiet. Wie mach staen blijuen Naer Dauids schrijuen En ghy met ons int oordeel wilt gaen Wy snoo catijuen, met siel en lijuen Souden int eewich vier moeten braen O Heere wilt ons in ghenaden ontfaen. Wilt doch nv spanen Naer Schrifts vermanen Dat oude leuen seer boos en quaet Beweent met tranen, en wilt niet wanen God sal vergheuen al v misdaet Want hy is doch selue ons aduocaet. Wilt niet verflouwen Maer vast betrouwen Op Christum onse voorspraecke goet Die ons van rouwen, en swaer benouwen Uerlost heeft door zijn liefde soet Met dat wtstorten van zijn roode bloet. Coemt al ghemeene Die licht in weene Beswaert met groote packen nv Want hy alleene, voor groot en cleene Sijn bloet ghestort heeft met grooten gru Uoor onse sonden dat segghe ick v. Heere ghepresen [pagina 61] [p. 61] Ghy wilt ghenesen Al ons crancheden in corter tijt Hier om by desen, also wy lesen Roept ghy alle die beladen zijt En maect ons van al onse sonden quijt. Wie soude nv trueren Als wy van vueren Weten dat onse sonden zijn betaelt Onse humueren, en swaer volueren Heeft God door zijn lijden afghehaelt Dus siet dat ghy hem te dancken niet en faelt. Laet doch niet lijen Eenighe tijen Christum te dancken van zijn liefde groot Want hy quam lijen, om ons beurijen Uan duyuel, sonde, helle ende doot En verlost al tsamen wter noot. Lof al te gader God ende Uader En seght hem lof en danck tot alder tijt Hy is die ader, en ons berader Die zijnen sone ghebenedijt Uoor ons allen ghesonden heeft inden strijt. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij