Veelderhande gheestelicke liedekens

Een ander.

ALle die Gods woort beminnen
Wilt beghinnen, vruecht tontfaen ⁺
Dlicht is ghecomen ter werelt binnen
Die de duysterheyt doet vergaen
Na schrifts vermaen
Dies wy gheloouighe coen, op dit saysoen ⁺
Al met den herderkens vruecht bestaen.

Israel wilt nv niet duchten
Uan v suchten, nv cesseert
Doude serpent dat moet nv vluchten
Een kindeken cleyn nv triumpheert ⁺
Ueriubileert
Hy is die sterre verheuen, wilt vrolick leuen
Daer Balaam af heeft ghepropheteert.

Als crachtich regent, het oude serpent
Heeft hy ghebrocht al int verdriet
Duyuel en doot heeft hy gheschent
En heeft ons al verlost om niet
Dus eer hem biet
Wilt vast betrouwen, sonder verflouwen
Door hem is ons ghenade gheschiet

Sijt al tsamen met Christo besneden ⁺
U boose seden nv wt roeyt
Hy heeft zijnen Uader ghestelt te vreden
Hy is de fonteyne die eewich vloeyt
Dus druck verfoeyt
Hy sal ons beurijen, om ons verblijen
Hy is den wijngaert breet ghegroeyt.

Princelicke nacie, tot deser spacie
En zijt niet meer van herten swaer
Ghy zijt verlost van uwer dolacie
Gods sone is ons gheboren eenpaer ⁺
Ons middelaer
Dus wilt ontfanghen, sonder verlanghen
Uan ons broeders dnieuwe Iaer.

+ Ioan.1

+ Luc.2.

+ Apoc.

+ Luc.2.

+ Luc.2.