Veelderhande gheestelicke liedekens
(1558)–Anoniem Veelderhande gheestelicke liedekens–
Auteursrechtvrij
[pagina 38]
| |
Ga naar margenoot+ AEnhoort o God mijn suchten en kermen
Alle mijn ghebeenten zijn onghesont
Uerout en verrot, o God wilt mijns ontfermen
Inwendich ben ick totter doot ghewont
Och God verhoort my nv terstont
En maect my dijnen Goddelicken wille cont
Toocht in my v onbegrijpelicke ghenaden
Die ghy den bedructen sondaren doet
Och God verlost my van allen quaden
Want v bermherticheyt is eewich goet.
Bedroeft benout och God wilt my aenhooren
Want ick ben v hantwerck van v ghemaeckt
Therte verflout, maect my dijn wtuercoren
Al ben ick o God van duechden naect
Doet dat mijn herte in v liefde blaect
Ende dat uwen geest in mijn binnenste daect
En rekent niet mijn groote misdaden
Ga naar margenoot+ Oft ick moet al inder hellen gloet
O God verlost ons van allen quaden
Want v bermherticheyt is eewich goet.
Die werelt heeft my heel versteken
Om dat ick v lieuer hadde dan haer
God staet my by doet therte van my spreken
Mijnen mont sal belijden v cracht eenpaer
Wast wt alle mijn ghebreken swaer
Trect my dat ick v mach volghen naer
Mijn hongerige siel wilt met v woort versaden
Ga naar margenoot+ So dat ick mach leuen by v vruchten soet
O God verlost ons van allen quaden
Want v bermherticheyt is eewich goet.
Hoe swaer en scherp snijt den bant door tlange dueren
Och God v roede proeft my wel
Mer God ghy zijt by hemlieden die trueren
Inden tijt des noots trect ghy wt ghequel
Salich zijnse die v niet en zijn rebel
Maer louende dancken uwen name snel
| |
[pagina 39]
| |
Ghelijck inden hemel als in deertsche paden
Uader uwen wille gheschieden moet
O God verlost ons van allen quaden Ga naar margenoot+
Want v bermherticheyt is eewich goet.
Dat v mishaecht in my, wilt dat wt planen
En schept in my eenen nieuwen gheest
Ghy ionste draecht al die v woort vermanen
Ghy en sultse niet laten o God beureest
Maer beschermen voor des doots tempeest
Ghy hebt ons gheopent dijns herten keest
Ghi zijt ons toeulucht, o God wilt ons beraden
Op al in al sydy alleene vroet
O God verlost ons van allen quaden Ga naar margenoot+
Want v barmherticheyt is eewich goet.
Ick bidde v hier Uader ick arm geuangen
Dat ghy my nv terstont by staet
Seer goedertier zijt ghy, boedt mijn verlangen
Den pijl des doots heeft my omuaet
Den Goddeloosen viant soect scherpen raet
Om my te benauwen met zijnder daet
Om cleyne cause soecken sy my te schaden
Stort in my dijnder ghenaden vloet
Och God verlost ons van allen quaden Ga naar margenoot+
Want v barmherticheyt is eewich goet.
Oorlof hier mede blijft al in God gepresen
Ende en wilt hem nemmermeer afgaen
Typeren inder stede daer ick was verwesen
Men sach my daer mijn hooft af slaen
Tghemeynte was met compassien beuaen
Ende weenden so menighen bitteren traen
Al voor mijn arm siele als dat sy baden
Om dat sy besitten soude Gods rijcke soet
Och God verlost ons van allen quaden Ga naar margenoot+
Want v bermherticheyt is eewich goet.
|
|