Veelderhande schrifturelijke leysenen ende gheestelijcke liedekens alle menschen tot devotie verweckende


Een nieu Liedeken, ende gaet Op de wijse: Hoe lustelijck is ons den coelen Mey ghedaen. HOe minlijc is ons des Cruycen boom ontda[en] Het spruyten geluwe bloemkens ander heyd[en] Soo wie met druck, met lijden is bevaen In Jesus wonden sal hy hem vermeyden. Den Mey die is al by den wech gheset Op eenen berch, ende die staet alsoo hooghe, Om dat een ieghelijck soude sonder let Des Cruycen Mey aenschouwen moghen. Nu staen des Meys tacken wt ghespreyt, En bloeyen schoon ghelijck de roode Roosen Soo wie sijn sonden hier beschreyt Onder desen boom sal hy hem verpoosen. Recht by ghewasschen is dat edel greyn, Ende is gheplant in alsoo diepen dale
[pagina 109]
Daer is Maria die suyver Maghet reyn Van minne soo stierf de fiere Nachtegale De fiere Nachtegale des cruyce boom op-clam Hy heeft zijn vederen soo wijt ontloken Hy sanck soo luyde die seven noten met hooge stam Soo dat zijn edel herteken is ghebroken. Nu is den Nachtegale bleven doot Tot salicheyt van alle mans en vrouwen Hy quam soo hooghe al wt zijns Vaders schoot Wie hoorde ieghelijck deser trouwen. Soo wie zijn sinnen onghestadich zijn Ende d'leven op aertsche creaturen Die merckt aen desen Nachtegale fijn Hoe hy de doodt om ons wilde besuren.