Veelderhande schriftuerlijcke liedekens
(ca. 1552-1554)–Anoniem Veelderhande schriftuerlijcke liedekens–
Auteursrechtvrij
[Folio Z1v]
| |
Paulus.
Wel op alle Gods ruyters knechten
Siet dat ghy v vromelijck weert
De weerelt compt ons beuechten
Grijpt Gods woort dat tweesnydende sweert
Om v vianden me te slaen
Wie totten eynde vroom sal blyuen
Die sal goeden loon ontfaen.
Weerelt.
Paulus met alle Gods knechten fijn
Waer in sidy dus wel ghemoedt
Wilt onder my weerelt gheuanghen zijn
En leuen naer vleesch en bloet
Ick sal v gheuen der wellusten spel
Met grooter schatten en rijcdommen
Sal ick v dienen seer wel
Syon.
Hoe souden wy ons geuanghen gheuen
Wy en zijn noch niet veruaert
Wy verbeyden een ander leuen
Belooft duer Christum vermaert
Hy gheeft ons zijn knechten goeden moet
En daer toe noch gheschoncken
Sijn costelijcke dierbaere vloet.
Weerelt.
Syon laet af v vermeten
Of ick sal v bestormen zeer fel
Ghy wert van my verbeten
Duer persequeren en veruolghen snel
En dat nv met menich valsch ingijen
Sal ick v gaen beschieten
Ghy en sult my niet connen ontvlien.
Syon.
Weerelt laet af v rasen
Met al v quaet nijdich ghespuys
Wy kennen seer wel v blasen
Met al v valsch abuys.
| |
[Folio Z2r]
| |
Te vergheefs toocht ghy aen ons v cracht
Christus ons alder Heere
Heeft benomen v macht.
Weerelt.
Syon ghy hoopken cleene
U vyanden zijn een groot ghetal
Ick en bestorme v niet alleene
U vianden zijn oock binnen v ouer al
Ghy en contse al ghekennen niet
Maer commet soo ick meene
Ick sal v bringhen int verdriet.
Syon.
Christus ons alder Capiteyn
Och wilt v stede Syon bystaen
En bewaertse int ghelooue reyn
Duer v Goddelijck woorts vermaen
Want tis om uwer eeren
Dat wy hier dus zijn benijt.
Christus.
Hoort mijn poorters van Syon
Die int ghelooue zijt gheplant
Wilt v haestelijck ten stryde spoen
En blijft in mijn woorts verstant
Totten tijt van minen hemelschen Uader beset
Dan sal ick in mijn eerlicheyt commen
Ende v lieden dan doen ontset.
|
|