Veelderhande schriftuerlijcke liedekens


192. Na die wijse ick segghe adieu. ONtwaeckt alle ghelijck Wilt Christum leeren kinnen Want zijn eewich rijck Heeft hy ons ghegheuen wt minnen En heeft ons alleen salich ghemaeckt Die na zijn woort te rechte haeckt En dat niet en versaect//en dat niet en versaect Met den nieuwen Iare, Gods leeringe smaect. Al wordy hier benijt Om het rechte woort vol eeren Christus naem belijt Uoor Coninghen,Princen, en Heeren
[Folio Z1r]
En wilt niet vreesen wat ghy doet Die cracht des gheests sal v de woorden goet Ingheuen metter spoet//ingheuen metter spoet Die ghy hem sult segghen hebt goeden moet Hy is den wech seer reyn De waerheyt en dat leuen Sy comen al certeyn Byden Uader hooch verheuen Die aen zijn woort te rechte hout Ende ander valsche afgoden schout Uan siluer oft gout//van siluer oft gout Den soon des menschen alleen betrout. Wilt dach ende nacht Sijn goddelijck woort vercleeren Uoor den vyperen gheslacht En wilt v niet verueeren Al wordy veruolcht zijt vry ghestilt Cristus is v stercke en uwen schilt Als ghy vechten wilt//als ghy vechten wilt Teghen valsche Propheten haer macht die smilt. Ghelooft den Uader vast Hy heeft ons sinen soone ghegheuen Op den vyant niet en past Want hy heeft hem verdreuen Hy en mach v niet crencken een hayr Die Godt vetrout is sonder vaer Broeders eenpaer//broeders eenpaer Hebt malcanderen lief int dit nieuwe Iaer.