Veelderhande schriftuerlijcke liedekens

185. Na die wijse. Beminder der consten.

ONtwaect mijn beminde bruyt wtuercoren
Spoeyt v naer v bruydegoms lusthof playsant
Wilt na gheen ander vrede boelkens sporen
Hout v alleen in mijn liefde gheplant
Ick wil uwer sielen zijn een onderstant
Ick sal v mijn trouwen inder eewicheyt

[fol. Y3v]

 

En inder rechtueerdicheyt seer habondant

 

Soo v duer de Propheet is toegheseyt.

 

 

 

O mijn alderliefste laet v liefde rijsen

 

Compt eet mijn broot en drinckt minen wijn

 

Die ick heb ghemengt om v te veriolysen

 

Compt tot die wateren als ghi dorstich sult zijn

 

Al en hebdy gheen gelt compt coopt v medecijn

 

Ick wil v gheuen des seker zijt

 

Mijn seluen op dat ghy in goeden schijn

 

My ghelijck sout zijn tot uwer profijt.

 

 

 

Mijn suster wilt v bruydegom betrouwen

 

En vreest oock niet in uwer meester noot

 

Ick weet dat ghy arm allendich zijt vol rouwen

 

Ia met veel sonden belast totter doot

 

Maer ick sal betalen v schulden cleyn en groot

 

Ist dat ghy v seluen my ouer gheeft

 

Want ick ghedaelt ben wt mijns vader schoot

 

Op dat ghy in eewicheyt met my leeft.

 

 

 

Reyn Lely bloeme neycht na my v ooren

 

Mijn weerste vrindinne mijns hertsen bruyt

 

Ick heb voor v ghemaeckt langhe te voren

 

Mijn Mirre met mijn welrieckende cruyt

 

Ghy weet wel dat ick v alleen besluyt

 

Onder tdecksel mijnder vloghelen ient

 

Op dat v vyanden die daer zijn wt

 

Om v te bederuen worden gheschent.

 

 

 

Oorlof Princesse willet ons vergheuen

 

Al zijn wy slecht in consten eenpaer

 

Wt rechter liefden hebben wy dit bedreuen

 

Om v te verblyden in dit nieuwe Iaer

 

Met het kindeken Iesus v bruydegom eerbaer

 

Die v en ons allen minst en meest

 

Duer zijn groote bermherticheyt claer

 

Wil verleenen zijnen heylighen gheest.