Veelderhande schriftuerlijcke liedekens

182. Na die wijse. Ick had een ghestadich minneken.

O Heere al inder eewicheyt
Hoe zijn wy dus verstoort
Want het al in v voorsienicheyt
Uoorsien is cleyn en groot
Uan der gheboorte tot in der doot
O Heere almachtich Uader
Leert ons alle gader
U belijden in onsen noot. ⁺

Wy zijn soo seer sorchfuldich
Al in dit aertsche pleyn
In lyden onuerduldich
Wy en weten niet certeyn
Uan dat ghelooue reyn
Dalder ghenadichste Heere
Willet ons toch leeren
Want ghy hebt die macht alleyn.

Dat ghelooue is groot en machtich ⁺
Dat segghe ick v voorwaer
Het maeckt den Lammen crachtich
Den blinden siende claer
Het is Gods gaue voorwaer ⁺
O Heere van alder weerden
Leert ons toch volheerden
In tghelooue voor ende naer.

O ghelooue sonder mincken
Wel te recht sidy vermaert
O Heer wilt ons ghedincken
Int ghelooue na uwen aert
Ons in tghelooue bewaert
O Uader tot allen vren
Ghedenckt v creatueren
Al inder henen vaert.

O ghy gheuer van alle goeden
En verlaet ons nemmermeer
Maer wilt ons toch behoeden
Uan alle valsche leer
Na v staet alle ons begheer

+ Mat.x.

+ Mat.ix.

+ Eph.ij.

[fol. X8v]

 

O Christus alle mijn bede

 

Ist dat ghy ons gheeft vrede

 

Door tgeloof aen onsen Heer.