Veelderhande schriftuerlijcke liedekens

[fol. X5r]

178. Na die wijse. Hoort altesamen bidt ende waect.

O Heere aensiet toch al mijn lijden groot
Gheeft my nv stercheyt in deser noot
Op dat ick niet en beswijcke
Maect my volstantich tot inder doot
Dat ick van v waerheyt niet en wijcke. ⁺

Op God staet alle mijn hope alleyn
Maect my van alle mijn sonden reyn
Wilt mijn ghelooue vermeeren ⁺
Uan v compt alle mijn hulpe ghemeyn
O almachtich Heere der Heeren.

O Uader vergheeft my alle mijn schult
Ick weet dat ghy my niet verlaten en sult ⁺
Maect my doch los van mijnen sonden
Ghy hebt my met uwen gheest veruult
Wie can v goetheyt doorgronden.

O Heere van v coempt alle mijn salicheyt ⁺
Wilt my verlossen niet langhe en beyt
Mijn stercte mijnen steen verheuen
Mijn toeulucht heb ick op v gheleyt ⁺
Ghy en sult my nemmermeer begheuen.

O God mijn siele is in my bedroeft ⁺
U goddelijcke helpe si behoeft
Mijnen steen waerom hebdy my verlaten
Helpt my o Heere niet en vertoeft
Want vele zijnder die my haten.

Wat bedroeft ghy v siele mijn ⁺
Waerom wilt ghy in my so truerich zijn ⁺
Stelt v betrouwen op den Heere
Ghy sult noch aenschouwen zijn claer aenschijn
Uwen druck sal in blyschap verkeeren

Ghy ghelouighen weest nv verblijt ⁺
Al eest dat ghy cleyn van ghetale zijt
Wie can v deeren ofte letten ⁺
Eest dat God den Heere voor ons strijt ⁺

+ Matth.x.xxiiij.

+ Lu.xvij.

+ Mat.vi.

+ Psa.lxij.

+ Psa.xviij.

+ Psa.xlij.

+ Mat.x.

+ Psa.xliij.

+ Ioan.xvi.

+ Luc.xij.

+ Ro.viij.

[fol. X5v]

 

Wie wil hem teghen ons dan setten.

 

 

 

Die Heere is stercker dan Casteel oft slot

 

O Heere weest my een beschermende Godt

 

Teghen alle mijn boose vianden

 

Ghy zijt o Heere mijn deel en lot ⁺

 

Uerlost my vander leeuwen tanden. ⁺

 

 

 

O Heere machtich inden strijt ⁺

 

O hooftman Israels die ons beurijt ⁺

 

O Godt na v heb ick verlanghen

 

Uwen dienaer die hier veruolghinge lijdt

 

Wilt hem toch in v rijck ontfanghen.

+ Psa.xvi.

+ Psa.xxij.

+ Ps.xxiiij.

+ iiij.Esdr.xvi.