Veelderhande schriftuerlijcke liedekens


165. Na die wijse. Ick was een clercxken ick lach ter scholen. O Heere weest doch mijns ghenadich Want teghen strijden lijt minen moet In mijnder noot//weest mijns beradich Alleen duer v verwacht ick tgoet Ghedenct dat woort ws monts warachtich Op dwelcke dat ghy my hope gaeft Dat was mijn troost zijt dees ghedachtich Hoe wel ghy mi nv aldus straeft. Dijn pijlen zijn in my ghesteken U hant is op my beswaert Metten dooden ben ick gheleken Ghelijck de ghene die onder vaert. Hoe langhe wilt ghy ommekeeren
[Folio U1r]
Hoe langhe lijdick tsviants smaet Uwen naem wilt toch gheuen eeren Oock hebdy recht op die misdaet. Ghy zijt doch selue die my op hief En vanden slijck op nam Mijn salicheyt ick van v besief En weest doch altijt niet soo gram. Castijende straft ghy mijn misdaet Mijn schoonheyt is te mael verteert Heel ydel is al tsmenschen raet Maer Heere v plaghe doch van my weert. Tis al een moort in mijn beenen Dat my mijn viant dus bespot Daghelijcx spreect hy met vereenen Daer en is gheen hulpe aen uwen God. Mijn siele hoe moechdy aldus dolen Ende wesen soo onrustich in my Godt heeft v sdaechs zijn goetheyt beuolen Tsnachts sedt hy zijn ghesanck by dy. Het was een vrouken van herten blijden Sy badt den Heere voor al dat leeft Noort oft Suyt west aen alle zijden Want hy eest alleen die voetsel gheeft.