Veelderhande schriftuerlijcke liedekens

162. Na die wijse. Mach ick ongheluck niet wederstaen.

[fol. T6v]

 

O Godt aenhoort desen droeuen sang

 

Mijn hert is bang

 

Om Ierusalem wilt hooren

 

Na haer staet alle mijn verlang

 

Ick ben seer swang

 

Om Syon wtuercoren

 

Och mocht si mijn//nv troosten fijn

 

Want ick hier niet//hoor dan verdriet

 

Uan die mijn siele verstooren.

 

 

 

Compt Heer aenhoort//mijn droefheyt groot

 

In minen noot

 

Mijnen gheest die is soo banghe

 

Hoe soude ick dy een liet met moet

 

Nv singhen bloot

 

Uan dees bruyt Syons sanghe

 

Als ick op haer//denck openbaer

 

Soo sucht ick siet//met swaer verdriet

 

Als een in doncker gheuanghen.

 

 

 

Singe ick o Heere van v Goddelijc woort

 

Twert niet ghehoort

 

Mer bespot van dese scharen

 

Hoe en sou minen geest niet zijn verstoort

 

Uan dit discoort

 

Ick ben in noot van baren

 

Had ick toch een//wt Syon reen

 

Met welcken ick hier//Godt dancken mocht fier

 

Hoe sou ick blijschap vergharen.

 

 

 

Ghetrou sing ick met Dauid siet ⁺

 

Hoe sou ick yet

 

Daer droefheyt is voorhanden

 

Den Heere nv singhen zijn liet

 

Hoort dit bediet

 

Soo verre in vremde landen

 

En daer Gods leer//niet en is in eer

 

Daer zijn stem voort//niet en is verhoort

 

Mer wort vermoort//met schanden. ⁺

 

 

 

O Ierusalem hoe sou ick dijn

+ Psal.c.xxxvi.

+ Psal.c.xxxvi.

[fol. T7r]

 

Uergheten sijn

 

Eest dat ick v verghete

 

Soo moet die rechte hant van mijn

 

Uergheten zijn

 

Hier bouen hooch gheheeten

 

Want ghy zijt reijn//Gods bruyt certeijn

 

Ghy ge[l]t oock pleijn//Gods woort alleijn

 

Dat moecht ghy v wel vermeten.

 

 

 

Die tonghe die moet my cleuen aen ⁺

 

Mijn wanghen saen

 

Ist dat ick niet en ghedencke

 

Op v O Syon hoort mijn vermaen

 

Ick wou eer gaen

 

Mijn lichaem voor v schencken

 

Eer ick sou dijn//vergheten sijn

 

Want ghy doch zijt//mijn vruecht altijt

 

Niemant en mach v crencken.

 

 

 

Troost mi mijn Godt mijn Prince bly

 

Want ick hoort my

 

Gans droeuich bin van gheeste

 

Met v moet ick eens rechten vry

 

Waerom hebdy

 

My hier ghesonden meeste

 

Want ick voor soet//crijch bitteren roet

 

Uoor blijschap meest//eenen droeuighen gheest

 

Tis nv eylaes mijn feeste.

+ Psal.[c].xxxvi.