Veelderhande schriftuerlijcke liedekens(ca. 1552-1554)–Anoniem Veelderhande schriftuerlijcke liedekens– Auteursrechtvrij Vorige Volgende 149. Na de wijse. Treet aen mijn vromer Lantsknecht. NU heffen wy een nieu liet aen Uanden Antichrist willen wijt bestaen God wil hem openbaren Ende met den gheest zijns monts verstaen Dat wil ick v verclaren. Opt trechte duyts is sinen naem Die altijt sal teghen Christum staen Met leeren ende met wercken Dit heeft die Paus soo langhe ghedaen Dat machmen nv wel mercken. Christus ghinck preken alle daghen Hy en reet op rossen noch op waghen Die Paus heeft soo heylighe voeten Die aerde is hem niet weerdich te draghen Alle Keysers zijn voeten cussen moeten. Christus die leefden in groot verdriet Alsoo veel eyghens en had hy niet Daer hy zijn hooft op rusten mochte Sint Peeter hy selfs visschen hiet Als hy die zijspenninck brochte. Hier teghen is die Paus soo rijck Ter weerelt vintmen niet zijns ghelijck Uan steden ende van sloten Die heeft hy ghecreghen met practijck Dat heeft God nv eens verdroten. Nv siet aen Christus die Gods soon Hy heeft ghedraghen een doorne croon Men mocht niet by hem gheraken Want opten berch is hy gheuloen Als men hem Coninck wilde maken. [Folio S5v] [fol. S5v] Hem seluen heeft die Paus ghestelt Bouen alle Coninghen met ghewelt Hy draecht drye croonen van gouden Ueel Kersten bloets stort hi int velt Dit moetmen voor heylicheyt houden. Sijn leer ghelt meer dan Gods ghebot Met Cristus woort houdt hy zijn spot Sijn doen is niet dan lieghen Sijn iongheren gaen gescoren ghelijck eenen sot Om den armen te bedrieghen. Christus die heeft den doot ghesmaect Hier wt heeft die Paus een craem ghemaeckt En aflaets brieuen gheschreuen Op datter niemant aen en raeckt Hy moeter veel ghelts om gheuen. Uan die misse maeckt hy een offerant Daer ons salicheyt aen hangt Is dat niet seer gheloghen Diemen doch alleen voor Christum ontfanckt Dus heeft hy ons bedroghen. Christus waer noch vermaledijt Hadden hem die missen niet beurijt Als si haer Canon lesen Soo bidden si God den Uader altijt Sijnen soon ghenadich te wesen. Hier wt heeft hy ghemaeckt dat Uageuier Daer in maeckt hy die sielen puer Als men hem ghelt toe wil dregen Dus heeft hy die heele weerelt schier Met valsheyt in ghecreghen. Ia Christum heeft hy nv vast gheleyt In yseren sloten soo men seyt Als men hem ghelt gheeft met hoopen Moet Christus altijt zijn bereyt De sielen te laten loopen. Hy seyt God heeft gemaect die oore biecht Daer hy doch valschelijck aen liegt [Folio S6r] [fol. S6r] Hy heeft [nu] self gheuonden Want hy die menschen daer door bedriegt En om dat ghelt vergheeft haer sonden. Sijn boosheyt heeft hi hier door gewrocht En menighe vrouwe ter schanden ghebrocht Want si claghen haer ghebreken Och dochter ick heb my alsoo bedocht Ick moet v alleen wat spreken. Dese sonden acht die Paus soo slecht Daer om verbiet hy zijn gheschoren decht Die is die mensche der sonden Daer sint Pauwels af heeft ghesecht Dat wort nv wel beuonden. Dit is den rechten Antekerst Die sweet ende bloet den armen wt perst Met bannen en met iaghen Nv is hy gheuallen dat hy berst God en wil hem niet langher verdraghen. Ick bid v Uader ghebenedijt Dat ghy hem doch ghenadich zijt En wilt hem gratie gheuen Op dat hy zijn sonden eens belijt En eewich met v mach leuen. Die dit Liedeken wt liet gaen Met lijden was zijn hert beuaen Bidt voor hem al ghelijcke Dat hy op Gods woort mag blijuen staen En daer af niet en wijcke. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij