Veelderhande schriftuerlijcke liedekens
(ca. 1552-1554)–Anoniem Veelderhande schriftuerlijcke liedekens–
Auteursrechtvrij
[Folio S4r]
| |
En ghy wt gront des herten tot hem gaet
Sucht ende weent voor v misdaet
Godt sal vergheten v sondich fenijn
Ons sonden schadich//droech hy ghestadich
Compt al tot desen medecijn.
Int openbaer//van elck sondaer
Heeft hy veel lieuer tleuen dan die doot
Coempt allegaer//tot dien outaer
Daer moechdy vinden troost in alder noot
Uersoeckt zijn bloedighe wonden root
Dat is den troon der gracien fijn
Hy is claer//ons middelaer
Coempt al tot desen Medecijn.
Christus verresen//ghesont maeckt desen
Die tot hem coempt met een ghelooue vast
Hy heuet bewesen//alsoo wy lesen
Aen Centurioens knecht seer belast
Christus die heeft hem aenghetast
Die hy ghenas van sinen ghepijn
Christus ghepresen//wilt hem ghenesen
Coempt al tot desen Medecijn.
O Criste almachtich//hebt lof eendrachtich
Die selue ons noot tot v gracie soet
Dit bleeck warachtich//ghy wert ghedachtich
Den blinden gheboren daer hy stoet
Hy riep tot v den schamelen bloet
U godlicheyt deet ghy hem aenschijn
Hy was deelachtich//in v gracie crachtich
Coempt al tot desen Medecijn.
Desen blinden gheboren//hiet ghy al voren
Hem wasschen tot eender water gaen
Daer heeft hy verloren//soo ghy moecht hooren
Sijn verblintheyt daer hy mede was beuaen
By desen water mach elck verstaen
Sijn bloedich wonden claer als wijn
Daer moechdy versmoren//v sondich toren
Coempt al tot desen Medecijn.
| |
[Folio S4v]
| |
Bidt sonder vermijden//Godt tallen tijden
So volchdy tvrouken van Cananeen naer
Groot was haer lijden//in allen zijden
Haer dochter zijnde in lyden swaer
Sy riep op Christum door tghelooue eenpaer
Al weygherde hy haer//een lanck termijn
Alsulck bestrijden, wert haer verblijden
Coempt al tot desen Medecijn.
Hoort zijn oorconden//men sal die honden
Niet gheuen sprack Godt der kinderen broot
Dats waer beuonden//was haer vermonden
Mer onder die tafelen vanden Heeren broot
Die hondekens eten cruymkens ter noot
O wijf groot is tghelooue dijn
Dwelck heeft ontbonden//v kint van sonden
Compt al tot desen medecijn.
Laet ons des Heeren//lof vermeeren
En singhen eewich zijn barmherticheyt
Hy wilse eeren//die tot hem keeren
Soo Christus selue heeft gheseyt
Lof hebbe zijn goedertierenheyt
Sy gaet te bouen al die wercken zijn
Na Dauidts leeren//met uwen seeren
Compt al tot desen Medecijn.
Hy heeft zijn leuen//voor ons ghegheuen
Al waer hy doot soo wie in hem betrout
Wert leuendich beseuen//ons sondich sneuen
Heeft hy versoent aent cruyce menichfout
Al en hebdy schat//siluer, noch gout
Compt tot hem hy en eyscht v niet een twijn
Die hem aencleueuen//werden verheuen
Compt al tot desen Medecijn.
Ons sondige wichten//o God wilt verlichten
Ghy hebt ons lieuer dan een moeder haer kint
Helpt ons beuichten//des vyants schichten
Want v licht oock ouer die sondaren schint
Als ouer den goeden soomen beuint
| |
[Folio S5r]
| |
Die op v gracie diuijn
Haer sinnekens stichten//sullen niet swichten
Ghy zijt ons wapen ende Medecijn.
|
|