Veelderhande schriftuerlijcke liedekens

145. Na die wijse. In een pryeel vol rieckende Roosen.

MOyses seer vierich in alle zijn wesen
Is op gheresen//seer stranghe ghegaen ⁺
Tot Sinay den berch ghepresen
Also wy lesen//naer sheeren vermaen
De thien gheboden heeft hy van Godt ontfaen
Daer stont in ghescreuen//hoe wy souden leuen
Naer Gods beuel schriftuerlijck beraen.

Laet ons met sanghe nv gaen verblijden
Op alle zijden//ghy volck van Israel
Aaron die heeft ten desen tijden
Om ons beurijden//gheblust ons groot gequel
Hy heeft een calf ghegoten duer ons beuel
Een God der Goden//elck wert nv gheboden

+ Exodi.

[fol. S1v]

 

Te doen omayge met sanghe en met spel.

 

 

 

Leuende kinders niet om bedwinghen

 

Laet ons nv singhen//gheestich triumphant

 

Desen nieuwen God die wy hier bringhen

 

Wilt dat wi springen//met vruechden so playsant

 

Hy heeft ons ghebrocht al wt Egypten lant

 

Als wy beseffen//moeten wy verheffen

 

Ons gulden calf als costelijcken pant.

 

 

 

Moyses ons voocht is achter bleuen

 

En heeft begheuen//zijn kinders al ghemeyn

 

Wie weet bescheet of hy mach leuen

 

Hy laet ons leuen//al sonder capiteyn

 

Dies wy een dierbaer beelde van goude reyn

 

Seer exalteren//als Godt adoreren

 

Bouen alle Goden al in des weerelts pleyn.

 

 

 

Dit Princelijck Calf moet ons behaghen

 

Dat wy hier draghen//op onsen pylaer

 

Om dat wy Moyses niet en saghen

 

In xl. daghen//het viel ons veel te swaer

 

Dus willent wy gaen setten op eenen outaer

 

Dat elck met brande//sal doen zijn offerhande

 

Dit gulden Calf met schoonen lichte claer.

 

 

 

Godt is een kender van allen saken

 

Met snelder spraken//vraechde hi Moyses bloot

 

Laet my v volck bringhen ter wraken

 

Ick sal v maken//een Regeerder groot

 

Een Calf hebben si ghegoten van Goude root

 

My ter oneeren//ghy moet haest afkeeren

 

Tis een misdaet bouen alle sonden snoot.

 

 

 

God scheen doen gram in dit verclaren

 

Doen ghinck hem baren//Moyses metter spoet

 

Heere ghy moet mijn volck noch sparen

 

Sonder beswaren//tempert uwen moet

 

Sy sullen my beschamen eest dat ghijt doet

 

Ist soo gheschepen//wilt my wt strepen

 

Wt den boeck des leuens duncket v goet.

 

 

 

Als Moyses langhe hadde ghebeden

[fol. S2r]

 

Gode was te vreden//Moyses doen vertrack

 

Commende daer den berch beneden

 

Die quade seden//hem ter herten stack

 

Om dat si tcalf aenbeden den beestelijcken sack

 

[Trefuys] van beelden//si dansten si speelden

 

Hy werp zijn steenen tafel datse brack.

 

 

 

Moyses seer grammich van dien dangiere

 

Dat Calf seer diere//werp hy inden brant

 

Hy stroyde tpuluer in menighertiere

 

Inde riuiere//lancx henen den cant

 

Elc moest puluer drincken naer zijn verstant

 

Dranck van allenden//met grooter amenden

 

Om dat hijse Tcalf aenbedende vant.

 

 

 

Prince van Leui wt dien gheslachte

 

Seer groot van machte//die Gods kinders zijt

 

Ghy sloecht doen met voorsinnich ghedachte

 

Duer Moyses clachte//naer Bibels belijt

 

Dryentwintich duysent bleuer daer subijt

 

Twert al versleghen//dat Leui quam teghen

 

Dit gulden Calf was cause vanden strijt.